Illegal dismissal sa sekyu

ni Atty. Persida Rueda-Acosta - @Magtanong Kay Attorney | November 5, 2022

Dear Chief Acosta,

Security guard ang aking asawa. Matapos magsara ang kompanya kung saan sila naka-assign ay ni-relieve at pinabalik sila sa kanilang ahensya. Sa kasamaang-palad, ang suweldo nila ay hindi rin naibigay. Dahil dito ay nagsampa sila ng reklamo sa NLRC upang makuha ang kanilang suweldo. Nang sila ay bumalik sa ahensya, sinabihan silang hindi muna sila mabibigyan ng bagong assignment hangga’t hindi inuurong ang kaso laban sa kanilang ahensya. Dahil dito inamyendahan ang kanilang reklamo na isama ang constructive dismissal. Sabi ng kanilang ahensya na hindi diumano sila tinatanggal at sila diumano ang nag-abandona ng trabaho dahil ayaw nilang tanggapin ang bagong assignment. Tama ba ito? - Jessa

Dear Jessa,

Ang iyong katanungan ay sinagot ng Korte Suprema sa kasong Symex Security Services, Inc. v. Magdalino O. Rivera, et al., G.R. No. 202613, November 8, 2017, kung saan sinabi ng Korte Suprema, sa pamamagitan ni Kagalang-galang na Mahistrado Alfredo Benjamin S. Caguioa, na hindi abandonment ang pagtanggi sa assignment na nilagyan ng kondisyon. Ayon sa Korte Suprema:

“A judicious review of the records of the case reveals that respondents were dismissed by Capt. Cura, the Operations Manager of petitioner Symex. Even as the Court has acknowledged the management prerogative of security agencies to transfer security guards when necessary in conducting its business, it likewise has repeatedly held that this should be done in good faith.

xxx

The assertion of Symex that the private respondents committed abandonment is contrary to the circumstances herein presented. While it is a recognized prerogative for the employer in the security services to reassign and post its security guards from time to time for the exigency of service, We however hold that in this case, the petitioner used such prerogative as a leverage in the withdrawal of the labor complaint filed against them by the private respondents.

It is well to remember that the private respondents in this case initially filed a labor complaint for monetary claims prior to their recall to the head office for possible reassignment and new postings. To believe that the private respondents refused to the new postings assigned to them because it will inconvenience them is unlikely and contrary to human experience.”

Bukod dito, sinabi rin sa nasabing kaso na ang pagsasampa ng kasong illegal dismissal ay taliwas sa pag-abandona sa trabaho. Ayon sa Korte Suprema:

“In this case, the respondents' act of filing a complaint for illegal dismissal with prayer for reinstatement belies any intention to abandon employment. To be sure, the immediate filing of a complaint for illegal dismissal, more so when it includes a prayer for reinstatement, has been held to be totally inconsistent with a charge of abandonment. To reiterate, abandonment is a matter of intention and cannot be lightly inferred, much less legally presumed, from certain equivocal acts.”

Tulad sa kaso ng iyong asawa, ang paglalagay ng kondisyon para sa pagbibigay ng bagong assignment, tulad ng pag-uurong ng kaso laban sa ahensya ay hindi ibinibilang laban sa manggagawa dahil karapatan ng empleyado na ipaglaban ang kanyang karapatan. Bagama’t may karapatan ang employer na ilipat ng puwesto ang security guard, maaari lamang itong gawin nang naaayon sa batas at hindi para i-harass o puwersahin ang huli na iurong ang kanyang reklamo. Bukod pa rito, ang agarang pag-amyenda ng iyong asawa sa kanyang reklamo sa National Labor Relations Commission (NLRC) para isama ang constructive dismissal ay taliwas sa abandonment na sinasabi ng kanyang ahensya. Kaya naman, maaaring sabihin na walang abandonment na nangyari sa kaso ng iyong asawa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.