Humidor, matikas sa Handicap ng SLLP

ni Green Lantern - @Renda at Latigo | August 8, 2022

Ipinakita ni Humidor ang husay nito sa rematehan matapos manalo sa PHILRACOM Rating Based Handicapping System na nilarga sa San Lazaro Leisure Park sa Carmona, Cavite, kahapon.

Bakbakan ang apat na kabayong matutulin sa largahan habang nakapuwesto sa pang-lima si Humidor na sinakyan ni veteran jockey Jeffrey Bacaycay.

Pagpasok ng huling kurbada ay unti-unting umusad ang winning horse at sa huling 100 metro sa rektahan ay kumuha na ng unahan si Humidor at tawirin ang meta ng may dalawang kabayo ang agwat sa pumangalawang si The Prize Is Yours.

Inirehistro ni Humidor ang 1:01.8 sa 1,000 meter race sapat upang ibulsa ang added prize na P20,000 para sa winning connection at karagdagang P5,000 para sa may-ari ng kabayo. "Mahusay ang pagkakadala kay Humidor, ang ganda ng remate," saad ni Danilo Dela Vega, karera veteran.

Dumating na tersero sa meta si Sagitsit, pumang-apat si Navu Cut habang pumanglima si Avenue Shopper sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, nagpakitang-gilas naman si Achi Holly sa isa pang PHILRACOM-RBHS na inilarga sa pangalawang karera.

Inilista ni Achi Holly ang 1:02 minuto sa 1,000 meter race upang angkinin ang panalo at sungkitin ng winning horse owner ang added prize na P5,000.

Ginabayan ni former Philippine Sportswriters Association, (PSA) Jockey of the Year awardee Jonathan Basco Hernandez, sinunggaban agad ni Achi Holly ang unahan sa largahan para manalo ng banderang tapos.