Hindi sapat ang pangako, kailangan ng kahandaan sa El Niño

by Info @Editorial | October 12, 2026

Pinawi ng Department of Agriculture (DA) ang pangamba ng publiko sa posibleng kakulangan ng suplay ng pagkain sa bansa dahil sa El Niño. 

Gayunman, hindi sapat ang mga pangakong walang magiging problema kung walang malinaw at konkretong plano laban sa matinding tagtuyot.

Hindi biro ang banta ng El Niño sa mga magsasaka, lalo na sa mga umaasa sa patubig at regular na pag-ulan. Kapag natuyo ang mga sakahan at bumagsak ang ani, hindi lamang kabuhayan ang nakataya kundi pati presyo ng pagkain sa hapag ng bawat Pilipino.

Dapat tiyakin ng DA na may sapat na irigasyon, ayuda, binhi at iba pang suporta bago pa lumala ang sitwasyon. Hindi puwedeng saka lamang kikilos ang gobyerno kapag nagmahal na ang bigas, gulay at iba pang pangunahing bilihin.

Ang seguridad sa pagkain ay hindi nasusukat sa magagandang pahayag kundi sa aktuwal na kahandaan. 

Ang tunay na sukatan ng tagumpay ng DA ay kung may sapat at abot-kayang pagkain ang mamamayan kahit sa gitna ng matinding tagtuyot.