Heightened alert status na… 25K personnel, ide-deploy nationwide para sa Kapaskuhan – PCG

ni Lolet Abania | December 5, 2022

Sasailalim na sa heightened alert status ang Philippine Coast Guard (PCG) para sa inaasahang pagdagsa ng mga Pilipino na maglalakbay sa dagat sa panahon ng Kapaskuhan.

“Ngayong magpa-Pasko, very busy ang mga kababayan natin traveling using sea transportation system,” pahayag ni PCG Commandant Admiral Artemio Abu sa mga reporters ngayong Lunes.

“Nandiyan ang Coast Guard. Bibigyan natin ng, ang ating mga kawani ng Coast Guard nationwide, we’ll put them in alert status heightened alert,” dagdag ng opisyal.

Ayon kay Abu, lahat ng 25,000 personnel ay kanilang ide-deploy sa buong bansa para magbantay sa karagatan sa holiday season.

Paalala naman ng PCG sa mga ship owners, na tiyaking lahat ng kanilang sasakyang-pandagat ay nasa maayos na kondisyon bago nila gawin ang kanilang mga trips o biyahe para na rin sa kaligtasan ng kanilang mga pasahero at crew.

Pinayuhan din ng PCG, ang mga mangingisda at ship crew na sumunod sa ipinatutupad na sea travel regulations upang makapagbigay ng komportable, ligtas, at kumbinyenteng transport service sa mga riding public.