Heat nilusaw ang Celtics, Butler nanaig kay Tatum

ni Anthony E. Servinio @Sports | May 19, 2023

Laro ngayong Biyernes – Ball Arena

8:30 AM LA Lakers sa Denver

Panahon na para seryosohin ang Miami Heat at si Jimmy Butler. Dumating ang koponan at niyanig ang paboritong Boston Celtics, 123-116, sa Game One ng NBA Playoffs Eastern Conference Finals kahapon sa TD Garden.

Unang umarangkada ang Celtics at itinayo ang 62-49 lamang sa bisa ng three-point play ni Jayson Tatum dalawang minuto bago magwakas ang first half. Gumanti ang Heat at biglang naagaw ang lamang at lumayo papasok sa 4th quarter, 103-91, sa likod ng 13 puntos ni Max Strus at 12 kay Butler.

Nakalapit muli ang Boston, 110-114, subalit sinagot ito ng magkasunod na tres nina Caleb Martin at Butler upang maging 120-110 at isang minuto ang nalalabi. Sapat na iyan sumandal ang Miami sa mga free throw nina Gabe Vincent at Butler para sa 1-0 lamang sa seryeng best-of-seven.

Nanguna si Butler sa kanyang 35 puntos at sumunod si Bam Adebayo na may 20. Tig-15 puntos sina Martin, Strus, Vincent at Kyle Lowry para kay kabayan Coach Erik Spoelstra.

Nagtala ng 30 puntos si Tatum habang 22 si Jaylen Brown. Kinailangan pa dumaan sa Play-In Tournament ang Heat at pumasok sa Playoffs bilang #8. Sisikapin nila sundan at higitan ang 1999 Knicks na umabot sa Finals bilang #8 subalit natalo sa San Antonio Spurs, 4-1.

Samantala, hahanapin ng Denver Nuggets ang 2-0 lamang kontra sa bisita Los Angeles Lakers sa Game Two ng West Finals ngayong araw sa Ball Arena. Nakuha ng Nuggets ang mahalagang 132-126 tagumpay sa Game One para sa unang hakbang patungo sa maaari unang pagpasok nila sa Finals.