Habang namamasada... E-trike driver binaril sa mukha, dedo

ni Maeng Santos @News | October 21, 2026

Photo: File

Dedbol ang 34-anyos na e-trike driver matapos barilin sa mukha ng hindi pa kilalang riding-in-tandem sa Malabon City, Lunes ng gabi.

Sa ulat ni Malabon police chief P/Col. Kenneth Mission kay NPD Director P/BGen. Benliner Capili, alas-8 ng gabi nang maganap ang pamamaril sa biktimang si alyas Christian, ng Brgy. Catmon, sa kanto ng M.H. Del Pilar St. at Basilio St. Brgy. Tugatog.

Lumabas sa imbestigasyon na habang namamasada ang biktima para pambili ng gatas ng bagong panganak niyang live-in partner nang barilin sa mukha ng isa sa mga suspek.

Dead-on-the-spot ang biktima habang mabilis namang tumakas ang mga suspek.

Sa beripikasyon, napag-alaman na nakulong na ang biktima dahil sa paglabag sa pag-iingat ng pampasabog noong Pebrero 19, 2024.