GSIS nakahanda para tulungan ang mga miyembro at pensyonado na apektado ng Bagyong Karding
ni Fely Ng - @Bulgarific | September 27, 2022
Hello, Bulgarians! Inihayag ni Government Service Insurance System (GSIS) President at General Manager Wick Veloso na nakahanda ang GSIS na buksan ang kanilang emergency loan program para tulungan ang mga miyembro at pensiyonado nito sa Luzon na naapektuhan ng super typhoon Karding.
“We have allocated Php4 billion for our emergency loan budget this year so we are ready to help our kababayan in Luzon. We will ensure that the loan assistance will be available to all qualified active members and old-age and disability pensioners based in the affected areas,” sabi ng GSIS Chief.
Ang kwalipikadong mag-apply ay mga miyembro na nasa aktibong serbisyo at hindi naka-leave of absence without pay; hindi bababa ng tatlong buwan ang bayad sa premium sa loob ng huling anim na buwan; walang nakabinbing kasong administratibo o kriminal; at may netong take-home pay na hindi bababa sa Php5,000 pagkatapos maibawas ang lahat ng kinakailangang buwanang obligasyon.
Samantala, ang iba pang loan window ay magagamit para sa mga miyembro at pensioner na hindi kwalipikado para sa emergency loan. Maaaring mag-apply ang mga miyembro para sa Multi-purpose Loan (MPL) Plus na mayroong maximum loanable amount na Php5 milyon, habang ang mga pensyonado ay maaaring humiram ng hanggang anim na buwang halaga ng kanilang pensiyon o hanggang Php500,000 sa ilalim ng enhanced Pension Loan program.
Naglaan din ang GSIS ng Php10 milyong halaga ng tulong-pinansyal para makinabang ang 25 paaralan sa buong bansa, 10 dito ay nasa Luzon, bilang bahagi ng Adopt-a-School Program nito sa pakikipagtulungan sa Department of Education. Kasama sa tulong ang suporta para sa teknolohiya at mga kagamitan sa pag-aaral, imprastruktura at kasangkapan.
Para sa detalye ng mga programa ng GSIS, maaaring bisitahin ng mga miyembro at pensioner ang GSIS website (www.gsis.gov.ph) o Facebook page (@gsis.ph); mag-email sa gsiscares@gsis.gov.ph; o tumawag sa GSIS Contact Center sa 8847-4747 (kung nasa Metro Manila) o 1-800-8-847-4747 (para sa Globe at TM subscribers) o 1-800-10-847-4747 (para sa Smart, Sun at Talk 'N Text subscribers).
Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.
Comments