Grand Slam title pipiliting kunin ng Cool Smashers sa PVL

ni Gerard Arce - @Sports | October 7, 2022

Bitbit ang malaking karanasan na nakuha sa pandaigdigang torneo, pilit na kukunin ng grupo ni Alyssa Valdez at Creamline Cool Smashers ang kauna-unahang Grand Slam title sa Premier Volleyball League (PVL) na magsisimula sa Sabado sa Santa Rosa Sports Complex sa Laguna.

Kasunod ng matagumpay na 6th-place finish sa nagdaang Asian Volleyball Confederation (AVC) Cup for Women sa Philsports Arena sa Pasig City at ang paglahok sa 2nd ASEAN Grand Prix kontra sa Thailand, Vietnam at Indonesia, malaki ang inaasahan sa Cool Smashers na magkasunod na sinungkit ang Open at Invitational Conference na maging paboritong koponan na babanat ng husto para sa ikatlong sunod na titulo.

“Expected naman na hindi magiging madali para sa amin, pero we prepared a lot. Hopefully maging advantage 'yung pagkuha namin sa international competitions,” pahayag ni head coach Sherwin Meneses sa ginanap na press conference ng PVL noong Miyerkules.

Ipaparada ng Cool Smashers ang 6-foot-2 wing hitter na si Yeliz Basa ng Turkey na naglaro sa Turkey National team at nagawang sumabak sa Japan V.League sa NEC Red Rockets at Thailand Volleyball League sa Nakhon Ratchasima, gayundin sa mga bansang Korea, Vietnam, Indonesia at Czech Republic.

Tiyak na magiging malaking problema sa walo pang koponan ang wing spikers ng Cool Smashers na mayroon ding middle blockers na nakakuha ng malaking karanasan sa international tourneys na sina back-to-back conference MVP Diana Mae “Tots” Carlos, Michelle Gumabao, Jema Galanza, Finals MVP Celine Domingo, Jeanette Panaga at Risa Sato, maging sina Lorie Lyn Bernardo, Rizza Mandapat, Rose Vargas Fille Cainglet, liberos Jorella De Jesus, ASEAN GP best libero Kyla Atienza, setter Kyle Negrito at Julia Morado-De Guzman.