Graft at malversation vs. Discaya

ni Jeff Tumbado @News | June 5, 2026

Photo: Senate PH

Naghain ang Office of the Ombudsman ng kasong graft at malversation laban sa kontratistang si Pacifico “Curlee” Discaya II at 10 iba pa kaugnay sa umano’y maanomalyang flood control project sa Calumpit, Bulacan.

Inihayag ni Palace Press Officer Undersecretary Claire Castro sa isang press briefing na pormal nang isinampa ang mga kaso laban kay Discaya at sa ilang opisyal ng Department of Public Works and Highways (DPWH) sa Malolos Regional Trial Court sa Bulacan.

Ayon kay Castro, pinangunahan nina DPWH Secretary Vince Dizon at Assistant Ombudsman Mico Clavano ang pagsasampa ng mga kaso na kinabibilangan ng:

• Paglabag sa Section 3 ng Republic Act No. 3019 o Anti-Graft and Corrupt Practices Act

• Kasong kriminal na malversation of public funds sa pamamagitan ng falsification of public documents.

Sinabi rin ni Castro na matagal nang nakakuha ng maraming proyekto ang mga Discaya, na nagsimula pa umano noong 2016.

Kasalukuyang nakakulong si Discaya sa Senado mula pa noong Setyembre 2025 matapos siyang ma-cite in contempt ng Senate Blue Ribbon Committee sa isa sa mga pagdinig tungkol sa mga umano’y maanomalyang flood control projects.