Gov’t. Employee na walang ‘K’, ‘wag bigyan ng bonus

@Editorial | November 16, 2023

Bigayan na ng bonus, siyempre hindi mapag-iiwanan ang mga nagtatrabaho sa gobyerno.

Kahapon, nagsimula nang ipamahagi para sa mga kuwalipikadong kawani ang kanilang year-end bonus at cash gift.

Ayon sa Department of Budget and Management (DBM), ang kanilang year-end bonus ay katumbas ng isang buwang basic salary. Habang P5,000 naman ang kanilang matatanggap na cash gift.

Ang naturang benepisyo ay mula sa P69.4 bilyong pondo na inilabas nito kung saan nasa P45 bilyon ang itinalaga para sa mga civilian personnel na nagtatrabaho sa national government agencies.

Samantala, aabot naman sa P15.2 bilyon ang allocated sa military at iba pang uniformed personnel.

Kabilang sa mga kuwalipikadong kawani ng gobyerno ay ang mga manggagawang nakapag-render ng kanilang serbisyo nang hindi bababa sa apat na buwan mula noong Enero 1 hanggang Oktubre 31, 2023.

Para sa mga empleyado ng gobyerno na talagang tapat sa kanilang tungkulin, na unang humaharap at nagbibigay ng solusyon sa problema ng taumbayan, masasabing hindi sasapat ang anumang halaga pero, marapat pa ring bigyan sila upang matustusan din ang pangangailangan ng kanilang pamilya.

Gayunman, sa mga pasaway na taga-gobyerno at tatamad-tamad, bukod sa ‘di na dapat bigyan ng bonus, mas dapat siguro ay pagsisipain na rin sa puwesto.

Maraming mas karapat-dapat at gustong maglingkod sa mamamayan, sila ang dapat na binibigyan ng pagkakataon.