Gomez, wagi ng gold sa FT Open Malaysia

ni Gerard Arce @Sports | June 1, 2023

Tumusok ng panibagong gintong medalya si University of the Philippines fencer Julianna Gomez sa women’s epee sa katatapos lang na 1st FT Open Championship 2023 sa Kuala Lumpur, Malaysia.

Napagtagumpayan ng 22-anyos na anak nina multi-athlete, sports at government official at versatile actor Cong. Richard Gomez at Ormoc City Mayor Lucy Torres-Gomez, ang kanyang kategorya nang mahigitan si Sara Sofea Idongesit ng Five Star Fencing Club KEDAH sa iskor na 15-12 sa Finals.

Nagpakitang gilas si Gomez patungong final round matapos talunin sina Xin Mynn Ho ng Blade Malaysia sa 15-11 iskor sa semifinal round, na nakakuha naman ng bronze medal kasama si Electra Goh ng Selangor.

“It was a great experience for me, and I’m happy to be able to win the gold and bring honor to the country,” saad ni Gomez, na nakatakdang magtapos sa UP ng Public Administration.

Napanatili ni Gomez ang malinis na kartada sa limang laro upang makuha ang top seed sa Direct Elimination bitbit ang Diliman Fencing Club. Ito ang ikalawang gintong medalya ng reigning UAAP women’s individual epee matapos makuha ang titulo sa Thailand noong isang taon.

Puntiryang makapasok ni Gomez sa national team, na paniguradong matututukan ang responsibildad nito sa pagtatapos sa kolehiyo dahil sa pangarap na makasalang sa 33rd Southeast Asian Games sa Bangkok, Thailand sa 2025.