Go at Sha duo, sumagwan ng ginto sa double sculls

ni Gerard Arce - @Sports | August 5, 2022

Nakasagwan ng gintong medalya ang tambalan nina Alyssa Hannah Go at Kharl Julianne Sha sa women’s lightweight double sculls (1000m), habang kinuha naman ni Southeast Asian Games runner-up Christian Joseph Jasmin ang isang silver medal sa 20th ASEAN University Games sa Bangkok, Thailand.

Hindi na ito ang unang pagkakataon na nagsama sina Go at Sha sa isang koponan, kasunod ng bronze medal performance sa 31st SEA Games sa Hanoi, Vietnam sa women’s quadruple sculls kasama sina Joanie Delgaco at Feiza Jane Lenton nung nagdaang Mayo.

Hinigitan ng national team members na sina Go, mula Ateneo de Manila, at Sha, na estudyante ng University of the Philippines, ang samahan nina Phuetthonglang Jirakon at Nunchai Nattariwan ng Thailand.

Nakuntento naman si Hanoi meet lightweight double sculls silver medalists Jasmin sa men’s lightweight single sculls (1000m) ng higitan ni Norhadi Mohamad Amirul ng Malaysia. Masuwerte pa ring nagtapos sa ikalawang pwesto si Jasmin na sumabak sa World Rowing U23 Championshipos sa Varese, Italy. Hindi pinalad si Jasmin, katulong si Tokyo Olympian Cris Nievarez sa lightweight double sculls sa World competition.