GMA, ayaw maipit sa banggaang Marcos vs. Duterte, no comment sa resignation ni VP Sara

ni Pablo Hernandez @Prangkahan | June 22, 2024

AYAW NA TALAGANG MAKIPAG-UNITY NI VP SARA KAY PBBM, KAYA INIHAIN NIYANG RESIGNATION LETTER, IRREVOCABLE! -- Irrevocable resignation letter pala bilang miyembro ng gabinete (Dept. of Education head at vice chairman ng National Task Force-End Local Communist Armed Conflict) ang isinumite ni Vice Pres. Sara Duterte-Carpio sa tanggapan ni Pres. Bongbong Marcos (PBBM).

Isa lang ang ibig sabihin niyan, ayaw na talagang makipag-unity ni VP Sara kay PBBM, boom!

XXX

DAPAT ANG ATENSYON NI GADON, PAANO MAIAHON SA KAHIRAPAN ANG MGA MARALITA AT HINDI NAKIKISAWSAW SA BANGAYANG MARCOS VS. DUTERTE -- Sinisi ni Presidential Adviser on Poverty Alleviation Sec. Larry Gadon si ex-P-Duterte sa pagre-resign ni VP Sara sa DepEd at NTF-ELCAC kasi raw madalas batikusin ng dating presidente si PBBM gayong alam naman daw nito (ex-P-Duterte) na miyembro ng gabinete ng Marcos administration ang anak niyang si VP Sara.

Sa rami ng maralita sa ‘Pinas, dapat iyan ang pinagtutuunan ng pansin ni Gadon dahil mandato niyang iahon sa kahirapan ang mga kapuspalad na Pinoy, pero ang inaatupag niya ay makisawsaw sa bangayan ng Marcos at Duterte, tsk! 

XXX

GMA WISE, NO COMMENT SA RESIGNATION NI VP SARA PARA HINDI SIYA MAIPIT SA BANGGAANG MARCOS VS. DUTERTE -- Hindi nagbigay ng anumang komento si former President at Pampanga Rep. Gloria Macapagal-Arroyo patungkol sa pagkalas ni VP Sara sa gabinete ni PBBM.

Wise din naman itong si GMA, kasi ang pag-no comment niya sa isyung ito ay pagpapakita na ayaw niyang maipit sa banggaang Marcos vs. Duterte, boom!

XXX

MAINAM ANG RESO NI ALBAY 3RD DIST. REP. CABREDO PARA SA MGA PULITIKONG SUGAPA SA DROGA, HINDI NA MAKAKANDIDATO -- Nagsulong ng resolusyon si Albay 3rd District Rep. Fernando Cabredo na humihikayat sa Comelec na ipairal nito ang drug testing sa lahat ng kakandidato sa 2025 midterm election.

Ayos iyan, para naman ma-reject agad ng Comelec ang mga kandidatong pulitiko na sugapa sa droga, period!