Gamit ng aktres, hinakot na raw, balikan malabo na… RHIAN AT SAM, HIWALAY NA NU’NG SEPTEMBER PA

ni Janiz Navida @Showbiz Special | November 21, 2025

Photo: File / FB Rhian Ramos

Last week of September, 2025 pa pala hiwalay sina Rhian Ramos at Sam Verzosa.

Actually, nadulas lang ang aming source nang mabanggit na hiwalay na ang showbiz couple na inakala ng marami na sa kasalan na mauuwi.

Itinanong namin ang dahilan ng hiwalayan pero ayaw pa raw umamin ni Sam. Basta ang nasabi lang daw nito, malabo na silang magkaayos ni Rhian dahil hinakot na ng Kapuso actress ang mga gamit sa bahay niya.

Sinubukan naming hingin ang reaksiyon ng long-time BFF at business partner ni SV sa Frontrow na si Raymond “RS” Francisco, at ito lang ang naging sagot sa amin ng aktor-director-businessman sa FB Messenger, “I'm busy, nakatutok sa mga event and projs.. No time na even think hahahaha!”

For sure ay maraming nalungkot sa balitang ito, lalo na ang mga fans nina Rhian at Sam na umasang sila na nga ang endgame.

Pero sa ngayon, tahimik pa ang parehong kampo, at abangan natin kung sino ang unang magbibigay ng statement, kung meron man.

‘Wag lang sanang maging kasing-ingay ng hiwalayang Derek Ramsay-Ellen Adarna, na kung gaano kalantaran ang halos antikin (‘di lang basta langgam, haha!) nang lambingan nila noon sa social media ay ganito rin kalantaran ang paglabas ngayon ng mga ‘baho’ sa kanilang naging pagsasama.

Ouch! 

---

Ayaw iwan ang R2K Band…

AILA SANTOS, INALOK NI OGIE, ‘DI UMUBRA

PERSONAL naming nasaksihan kung gaano kagaling kumanta ang Davao-based singer na si Aila Santos na minsan na rin palang naging finalist ng Tawag ng Tanghalan ng It’s Showtime.

Naging talent na rin sana si Aila ng ABS-CBN at maraming plano sa kanyang career, kaso nga, dahil nawalan ng franchise ang network, napurnada ang pagsikat ni Aila at pagpasok sa mainstream music industry.

Ganunpaman, hindi naman tuluyang nagpahinga si Aila dahil kasama ang kanyang R2K Band, itinuloy nila ang paggi-gig sa mga bars sa Davao at nagtayo na rin ng sarili niyang bar ang singer kung saan twice a week daw siyang nagpe-perform kasama ang kanyang banda.

At bukod sa mga gigs, million views din ang inaani ni Aila at ng R2K Band sa kanilang YouTube Channel, kaya kahit wala siyang TV exposure, nagkaroon ng maraming followers si Aila at in fact, pinagsasabong pa nga sila ng kapwa niya produkto sa TNT na si Gigi de Lana.

Pero nilinaw ni Aila na hindi man sila super friends ni Gigi, wala raw silang issue kahit pa nga pinagtatapat at pinagkukumpara sila ng mga fans.

Ang Asia’s Songbird na si Regine Velasquez daw ang ultimate idol ni Aila Santos at gustong maka-collaborate sa isang song. Although, naka-duet na raw niya si Regine sa isang singing competition na sinalihan noon sa kanilang probinsiya, kung saan nag-judge yata ang Asia’s Songbird.

At dahil nagba-viral at sumisikat nga ngayon si Aila dahil sa million views ng kanyang mga song covers sa YouTube, naging interesado raw si Ogie Alcasid na alukin siya ng singing career under ATeam (Alcasid Total Entertainment & Artist Management).

Ang siste, hindi naman daw sa tumanggi si Aila sa magandang offer sana ni Ogie na kunin siyang talent at i-develop as a solo singer, kaya lang, may mga natanguan na raw kasi silang singing engagement abroad ng kanyang banda at hindi naman daw puwedeng basta na lang niya iwan ang mga kagrupo lalo’t ang guitarist pala ng R2K na si Lucky Sunday ang tatay ng kanyang dalawang anak (isang 20-yr-old at isang 13-yr.-old).

Nilinaw din ni Aila na hindi pa naman siya nagsasara ng pinto sa offer ni Ogie da Pogi at sana raw, ganu’n din ang singer-composer, para kung sakaling tapos na ang mga commitments ni Aila at ng kanyang banda, baka sakaling ma-consider na niyang tuluyang pasukin ang mainstream music industry.

Sa ngayon, dahil ang daming fans ni Aila Santos ang nagre-request na mapanood siya nang live na mag-perform, ipinag-produce siya ng It’s My Turn concert sa Teatrino Promenade sa Greenhills ng concert producer na si Carnie Banares ng Stargaze Productions na gaganapin sa December 13.

Kami na ang magsasabi, sulit na sulit ang mga manonood nang live kay Aila Santos dahil napakagaling niyang kumanta at in fact, parang minamani-mani niya lang ‘yung Against All Odds na version pa ni Mariah Carey nang iparinig niya ito sa entertainment media sa ginanap na mediacon niya sa Music Box last Monday.

So, guys, buy na kayo ng ticket ng It’s My Turn ni Aila Santos at for sure, kahit kayo, bibilib sa kanya.