Folayang vs. Parr sa 10th year ng ONE sa Singapore

ni Gerard Arce - @Sports | March 7, 2022

Punumpuno ng aksyong hatid ng ika-10 anibersaryo ng ONE Championship na ONE X sa pagtatapat nina Filipino Team Lakay Eduard “Landslide” Folayang at Australian John Wayne “The Gunslinger” Parr sa Marso 26 sa Singapore Indoor Stadium sa Singapore.

Determinado ang 36-anyos na two-time ONE Lightweight champion na maputol ang four-fight losing streak laban sa nakakaranas din ng losing streak sa tatlo na 45-anyos na 10-time World champion at runner up ng The Contender Asia kung kaya maituturing na alamat laban sa alamat; Wushu Sanda laban sa Muay Thai legend; striker vs striker ang bakbakan.

Sunod-sunod na nabigo sa laban si Folayang mula kina Pieter Buist sa Fire and Fury 2020, Antonio Caruso sa Inside the Matrix; trilogy kay Shinya Aoki sa TNT 4 noong 2021 at Zhang Lipeng sa Battleground II sa Singapore. Dahil dito bumagsak ang record ng three-time SEAG wushu gold medalist 22-12.

Ang laban nina Folayang at Parr ay nasa ilalim ng ONE Super Series Muay Thai rules, kung saan magiging kauna-unahang miyembro ito ng Team Lakay na lilipat ng paglalabanan mula sa MMA patungong Muay Thai. Tatlong dekadang lumalaban ang Australian pro boxer at kickboxer, kung saan ilan sa mga tinalong malalaking pangalan ay sina Yodsanklai Fairtex, Lamsongkram Chuwattana at Dzhabar Askerov.

Paniguradong kapananabikan ang basagan ng mukha ng dalawa na kapwa kilala sa kanilang mabibigat na kamao at eksplosibong mga striking skills bilang pambungad na tampok ang pinaka-aantabayanan na Special Rules Super-Fight sa pagitan nina MMA legend at dating UFC flyweight champion Demetrious “Mighty Mouse” Johnson at reigning ONE flyweight muay thai champion Rodtang “The Iron Man” Jitmuangnon.

Bukod sa laban, parte rin ng dambuhalang fight card ang pagbabalik ni women’s Atomweight champion Angela “Unstoppable” Lee na itataya ang titulo kay ONE Atomweight Grand Prix champion Stamp “Nong Stamp” Fairtex, gayundin ang pagdedepensa ni ONE Flyweight champion Adriano “Mikinho” Moraes kontra kay No.2 ranked Yuya “Little Piranha” Wakamatsu.