Fight Of The Year Sequel nina Donaire at Inoue, nasa negosasyon na

ni Gerard Arce - @Sports | January 19, 2022

Ang pinaka-aabangan at pinakahihintay na 2019 Fight of the Year sequel sa pagitan nina unified IBF/WBA/The Ring bantamweight champion Naoya “Monster” Inoue ng Japan at WBC title holder “The Filipino Flash” Nonito Donaire ay nasa punto na ng negosasyon upang muling masaksihan sa Abril sa Japan.

Ibinulgar ni Probellum CEO at promoter ni Donaire na si Richard Schaefer na may pag-uusap na sa promoter ni Inoue na si Akihiko Honda ng Teiken Promotions na muling ganapin sa Japan ang rematch, habang hindi papahuli ang Top Rank Promotions ni Bob Arum kasunod ng pagpirma ni Inoue matapos talunin si Donaire sa unang paghaharap.

“This is definitely a fight we would love to do and Nonito would love to have it as well.

We don’t have a problem going to Japan. Donaire has the balls to go into the lion's den again.

This is one of the biggest fights you can make in the sport,” pahayag ni Schaefer sa Boxingscene.com. “I can’t speak on behalf of Inoue, but I know that’s the fight he wants as well. I’ve always believed that when there is a big fight to be made, you make it – and this is a big fight. I am going to exhaust every resource and will not leave any stone unturned to pull off this fight. This is what Nonito and the fight fans want. We as a sport need to deliver it. I believe we’ll get it done.”

Nagtapat noong Nob.7, 2019 sina Inoue (22-0, 19 KOs) at Donaire (42-6, 28 KOs) para sa unification bout at finals ng World Boxing Super Series bantamweight division sa Super Arena sa Saitama, Japan, kung saan nagresulta sa panalo para sa hometown hero na si Inoue para makuha ang unanimous decision victory sa 111-116, 113-114 at 109-117.

Sa tagpong iyon ay nakatikim ng 11th round knockdown si Donaire, habang nakikipagbanatan si Inoue na may tama sa kanang mata na kinakitaan ng matinding palitan ng suntok sa isa’t isa mula sa 227 na patama ni Inoue kumpara sa 141 lamang ni Donaire.

Sapol ng matalo sa mas batang si Inoue, muling bumangon ang 39-anyos mula Talibon, Bohol, para agawin ang WBC 118-pound title kay Nordine Oubaali ng France via 4th round knockout nung Mayo 21, 2021.