Eochirunran, nanlampaso sa 3-yo SLLP Maiden Race

ni Green Lantern - @Renda at Latigo | May 24, 2022

Walang kahirap-hirap na sinikwat ni Eochirunran ang panalo sa 3-Year-Old & Above Maiden race matapos nitong ilampaso ang mga nakatunggali noong Linggo ng gabi sa Santa Ana Park sa Naic, Cavite.

Sinakyan ni class A rider Kelvin Abobo, hindi na pinaporma ni Eochirunran ang mga nakalaban paglabas ng starting gate.

Agad na sinunggaban ni Eochirunran ang unahan sa arangkadahan kaya nahawakan nito ang apat na kabayong lamang pagsapit ng huling 600 metro ng laban.

"Nakakabilib si Eochirunran, batang kabayo pa lang pero super na ang galing niya, future champion 'yan," saad ni Joselito Manalo, veteran karerista.

Solo pa rin sa unahan si Eochirunran sa rektahan, wala pa rin ang nakadikit kaya tinawid nito ang meta ng walang kahirap-hirap.

Inirehistro ni Eochirunran ang tiyempong 1:20.6 sa 1,300 meter race sapat upang ibulsa ang added prize na P10,000 sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Dumating na segundo si Truthmaker habang tersero si Cocomelon na sinakyan ni Lester De Jesus.

Binulaga naman ni Bonifacio ang mga liyamadista nang manalo ito sa PHILRACOM Rating Based Handicapping System na pinakawalan sa pangatlong karera.

Nanalong dehado si Bonifacio na nirendahan ni Jimmy Siego, nasikwat nito ang karagdagang premyo na P5,000 matapos irehistro ang 1:23.2 sa 1,300 meter race.

Sumegundo si Hulyo Disenueve, tersero si Black Magic Woman habang pang-apat si Dimakya Island.

Samantala, hindi binigo ni Galing Sa Mabait ang mga liyamadista nang manalo sa isa pang PHILRACOM Rating Based Handicapping System.