Empire Ruler bumida sa Maiden Race

ni Green Lantern - @Renda at Latigo | February 08, 2022

Lumabas ang husay ng bagitong kabayo na si Empire Ruler matapos manalo sa 3-Year-Old & Above Maiden race noong Linggo ng hapon sa Santa Ana Park sa Naic, Cavite.

Inirehistro ng anak nina Real Big Thing at Empire Lady na si Empire Ruler ang tiyempong 1:25.6 minuto sa 1,300 meter race sapat upang hamigin ng horse owner na si Bienvenido Niles ang added prize na P10,000.

Sinakyan ni jockey JL Ramos ang nadehadong si Empire Ruler sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Pangalawang tumawid sa meta si Green Archer, tersero si Chase The Gold habang pumang-apat si Med-Bays.

"Maganda ang ipinakitang performance ni Empire Ruler sa tingin ko mahusay na kabayo siya at puwede natin abangan ang kanyang future," saad ni Jelo Villegas, karerista.

Hindi rin nagpadaig si Pilya matapos magpakitang-gilas sa Condition Race (23) na pinakawalan sa pang-limang karera.

Nagwagi si Pilya sa nasabing event matapos siyang sakyan ni JML Siego, sinunggaban agad ng winning horse ang unahan sa largahan pero dinikitan siya nina Sweetness at Black Magic Woman.

Bakbakan sina Pilya, Sweetness at Black Magic Woman sa unahan ang nasilayan ng mga karerista pagdating ng kalagitnaan ng karera, malayong pang-apat si Lion's Gate.

Sa huling 600 metro ng laban ay nasa unahan na si Black Magic Woman subalit hindi siya pinalayo ni Pilya.

Pagdating ng rektahan ay inagaw ni Pilya ang unahan upang tawirin ang meta ng may isang kabayo ang agwat sa nasegundong si Gensan Special.

"Ibang klase ang ipinakitang galing ni Pilya, nakakabilib." ani Jun Tolentino, veteran karerista.

Inilista ni Pilya ang tiyempong 1:23.6 minuto sa 1,300 meter race.