Eala mag-uuwi ng P6.3M kahit inalat vs. Czechia

ni Gerard Arce @Sports News | March 25, 2026

Photo: WTA (Official)

Bagamat kinapos sa kampanya si Filipina tennis star Alexandra “Alex” Eala sa 2026 Miami Open, magbubulsa siya ng $105,720 o mahigit P6.3 million matapos mabigo sa ika-12 pagkakataon kay Czech tennister World No. 14 at 13^th seed Karolina Muchova sa iskor na 0-6, 2-6 kahapon ng madaling araw sa round-of-16 sa Hard Rock Stadium sa Miami Gardens, Florida.   

Hindi umepekto ang mahika na aminadong hindi naging maganda ang kabuuang performance laban sa mas beterano at mas dekalibreng laro ng 2026 Qatar Open women’s titlists. “I think she played really well… and I definitely did not play my best, but of course, that’s also a big part because of how she played,” wika ni Eala sa post-match interview.

Nanatili pa ring malaking tinik sa lalamunan ni Eala ang mga Czechian na sina Linda Noskova (Indian Wells Open); Tereza Valentova (Doha at Osaka Open); Marketa Vondrousova (Montreal); Barbora Krejcikova (Wimbledon); Linda Fruhvirtova (Birmingham); Marie Bouzkova (Jiujiang at Guadalajara); Katerina Siniakova (Wuhan); Tereza Martincova (ITF Slovakia); at Gabriela Knutson (W60 Nantes).

Kumita si Eala ng kabuuang $332,160 at unti-unting naka-angat sa World rankings kabilang ang pagkamit ng kauna-unahang women’s singles title sa Guadalajara 125 Open sa Mexico noong 2025 hanggang sa makapaglaro sa mga prestihiyosong Grand Slam tourney tulad ng US Open at Australian Open.