Eala giniba ang Olympian gold, may tsansa na sa Olympic mint

by Gerard Arce @Sports News | July 30, 2026

Photo: Alex Eala vs defending champ Leylah Fernandez - WTA

Kinumpleto ni Filipina tennis star Alexandra “Alex” Eala ang tatlong medalist ng 2024 Paris Olympics matapos isunod sa listahan ang gold medalist na si Qinwen Zheng ng China sa bisa ng come-from-behind 4-6, 6-4, 6-1 na panalo sa 2026 Mubadala DC Open upang umusad sa round-of-16 kahapon ng madaling araw na ginanap sa William H.G. FitzGerald Tennis Center sa Rock Creek Park sa Washington, D.C.

Naunang dinaig ng 21-anyos na lefty si silver medalist Donna Vekic sa ASB Classic habang pinataob si dating World No.3 at bronze medalist Iga Swiatek ng Poland na dalawang beses tinalo sa 2025 Miami Open at sa Wimbledon Open.  

Samakatuwid, may tsansang magwagi ng medalya sa 2028 Los Angeles Games si Eala na nagawa ring makabawi kay Zheng sa pagkatalo sa 2022 Hangzhou Games semifinals, na siya ring gold medalist ng naturang Asian quadrennial meet.

Kinakailangan na lang na manatiling nasa Top-50 ang Hangzhou Games double bronze medalist upang lumaki ang tsansang makahataw si Eala sa LA Olympics.

Nakatuon muna ang atensiyon ng SEA Games titlist kay Fil-Canadian at defending champion Leylah Fernandez na nagawang pataubin sa 1st round si Magda Linette ng Poland sa 6-1, 6-4 sa round of 16.

Sakaling magwagi si Eala kay Fernandez ay malaki ang posibilidad na makaharap nito sa rematch si World No.2 at second seed Elina Svitolina ng Ukraine. Nakasisiguro na si Eala ng $24,474 o mahigit P1.5 milyon sa 2nd round at maaaring makapasok sa pinakamataas sa World No. 25 sakaling manaig kay Fernandez pa-q'finals.