Dr. Zacate, bilang FDA chief – P-BBM

ni Lolet Abania | August 3, 2022

Itinalaga ni Pangulong Ferdinand "Bongbong" Marcos Jr. ang kanyang lead physician na si Dr. Samuel Zacate, na mamuno sa Food and Drug Administration (FDA), ayon kay Press Secretary Trixie Cruz-Angeles ngayong Miyerkules.

Nang tanungin si Cruz-Angeles kung si Zacate na siyang lead doctor ni Pangulong Marcos ay isang factor para sa bago nitong appointment, sinabi niya na qualified ang bagong FDA chief para sa posisyon.

“He is qualified plus he has several distinctions so we are not sure if his being a personal physician factored into this considering he ticks all the boxes, meaning lahat ng requirements bilang FDA [chief] he fulfilled,” pahayag ni Cruz-Angeles.

Ayon kay Cruz-Angeles, si Zacate ay kilala bilang isang public health advocate na bumilang ng mga taon ng pagiging dalubhasa sa medicine at medical consultancy sa iba’t ibang government offices.

Si Zacate ay isang diplomate ng Philippine Society for Venereology at isang fellow ng International College of Surgeons, sabi ni Cruz-Angeles.

Samantala, ang iba pang bagong appointees ay sina retired Brigadier General Roman "Popong" Felix bilang Secretary ng Office of the Presidential Adviser on Military Affairs; retired Major General Ariel Caculitan bilang OPAMA Undersecretary for Military Affairs; retired general General Isagani Nerez bilang Undersecretary for Police Affairs; at Atty. Nesauro Firme sa Judicial and Bar Council.