DQ sa mga pasaway na kandidato, ilabas na

@Editorial | October 17, 2023

Ngayong linggo inaasahang mareresolba na ang mga disqualification cases na nakahain laban sa mga kandidato sa Barangay at Sangguniang Kabataan Elections (BSKE).

Ayon sa Commission on Elections (Comelec), umabot na sa 125 ang mga disqualification cases na hawak nila at nangako na maglalabasan na ang mga desisyon sa mga ito.

Kung hindi naman makakapagdesisyon sa isang kaso bago ang araw ng halalan dahil sa kakapusan ng panahon, may kapangyarihan ang Comelec para suspendihin ang proklamasyon ng isang kandidato na may nakabinbin na disqualification case.

Tiniyak naman na hindi magkakaroon ng kawalan ng liderato sa isang barangay kung hindi pa mapoproklama ang mananalong kandidato dahil sa maaaring pansamantalang humalili ang number 1 na kagawad.

Sana ay matapos nga ang desisyon ngayong linggo para hindi na makigulo ang mga kandidatong pasaway sa mismong kampanya.

Kung makalusot man sa Comelec ang mga matitigas ang ulo at kapalmuks na kandidato, nasa kamay ng mga botante ang kanilang kalalagyan -- huwag iboto.