Donaire, Casimero at Inoue may title defense sa Disyembre

ni Gerard Arce - @Sports | November 3, 2021

Balik-aksiyon ang tatlong hari ng bantamweight division sa Disyembre na sina unified IBF/WBA/The Ring champ Naoya “Monster” Inoue ng Japan, WBC titlist “The Filipino Flash” Nonito Donaire at WBO title holder “Quadro Alas” John Riel Casimero para sa magkakahiwalay na title defense.

Itataya ng undefeated na 28-anyos mula Zama, Kanagawa ang tatlong titulo sa ikatlong pagkakataon kay IBF 6th rank at IBF Pan Pacific 118-pound titlist Aram “Kennakorn GPP Ruakaimook” Dipaen ng Thailand sa Dis. 14 sa Kokugikan, Tokyo, Japan sa co-main event ng Wilfredo Mendez at Masataka Taniguchi match para sa WBO minimumweight.

Nagtagumpay sa titulo si Inoue mula kina Australian Jason Moloney via 7th round knockout Oct. 2020 at Michael “Hot and Spicy” Dasmarinas via 3rd round KO noong Hunyo 2021.

Isang All-Filipino bout naman para depensahan ng 39-anyos na si Donaire para sa WBC title kay WBC interim Reymart “Assassin” Gaballo sa Disyembre 11 sa Dignity Health Sports Park sa Carson City, California sa U.S.

Hindi pa naman malinaw kung gaganapin sa Liverpool, England o Dubai, UAE ang 3rd title defense ng 31-anyos ng tubong Merida, Leyte sa Dis. 11 laban kay dating IBF 118-lb titlist Paul Butler ng England.

Minsan nang nagtapat sina Inoue at Donaire noong 2019 sa Japan para sa IBF/Ring/WBA at World Boxing Super Series 118-lbs title na nagtapos sa 12-round unanimous decision sa unbeaten Japanese.

Naudlot ang Inoue vs. Casimero noong Abril 2020 sa Vegas bunsod ng COVID-19 pandemic. Hindi rin natuloy ang All-Filipini blockbuster unification match nina Casimero at Donaire dahil sa VADA doping testing issue na nauwi sa title defense ni Casimero kontra Guillermo Rigondeaux ng Cuba na nagtapos sa split decision para sa Pinoy.

Napanalunan ng undefeated na si Gaballo (24-0, 20KOs) ang WBC interim title laban kay Emmanuel “Manny” Rodriguez noong Disyembre 2020 via controversial split decision.

Mayroon namang 7-fight winning streak si Butler (33-2, 15KOs) na nagwagi ng bakanteng WBO International 118-lb title laban kay Willilibaldo Garcia ng Mexico via 10th split decision, habang si Dipaen naman ay may anim na sunod na panalo na lahat ay nagmula sa knockout victory na kakaharapin si Inoue hawak ang 12-2 at 11KOs.