ni Seigusmundo Del Mundo - @Panaginip, salamin ng inyong buhay | February 16, 2021
Salaminin natin ang panaginip ni Eunice na ipinadala sa Facebook Messenger.
Dear Professor,
Ang panaginip ko ay tungkol sa tiyahin ko dahil palagi ko siyang napapanaginipan, bakit kaya? Masama ang loob ko sa kanila at maging ‘yung patay ko nang tiyahin ay napapanaginipan ko rin. Masama rin ang loob ko sa tiyahin ko na ‘yun.
Bukod pa ru’n, nanaginip din ako ng daanang pataas. Gayundin, ang ate ko ay nanaginip na kasama niya sa picture ang nanay naming matagal nang patay. Ano ang kahulugan ng mga panaginip kong ito? Maraming salamat!
Naghihintay,
Eunice
Sa iyo, Eunice,
Ganito ang nasusulat, bago ka matulog, patawarin mo ang iyong kapatid na nagkasala sa iyo. Ang nabanggit na banal na utos ay tila hindi natutupad ng kahit na sino. Kaya minsan ay sadyang nakapagtataka dahil utos nang utos si Lord, pero ang mga iniuutos naman niya ay mahirap sundin, kaya walang sumusunod.
Kaya lang, sabi nga, si Lord ang tunay na nakakaalam kung ano ang dapat at ang mga hindi dapat ay alam nating mga tao. Ang tao mismo ay puwedeng-puwede ring makaalam ng kung ano ang mabuti at masama.
Sabi ng mga dalubhasa, mas magandang matulog nang walang anumang sama ng loob sa puso at isipan. Ang mga salitang ‘yan ay madali namang paniwalaan, pero ang mahirap paniwalaan ay ang dagdag na kaalaman mula sa mga dalubhasa kung saan ang sabi nila, puwedeng bangungutin ang matutulog na mabigat ang dibdib o kalooban.
Narinig mo na ba ang kuwento ng mga taong nababangungot? Hindi ba ang sabi nila, parang may mabigat na dumadagan sa katawan kaya hindi sila makagalaw?
Parang tama ang mga dalubhasa sa pagsasabing dapat matulog nang walang sama ng loob.
Kaya, kahit mahirap sundin ang nasusulat, patawarin mo muna ang iyong mga kaanak sa kasalanang nagawa nila sa iyo. Sa ganyang paraan, mawawala na ang mga panaginip mo hinggil sa iyong tiyahin, gayundin, hindi ka na babangungutin at higit sa lahat, makakatulog ka pa nang mahimbing.
Hanggang sa muli,
Professor Seigusmundo del Mundo