ni Mai Ancheta @News | July 21, 2023
Nagbanta ang isang grupo na ibabalagbag nila ang kanilang mga trak sa North Luzon Expressway bilang protesta sa taas-singil sa toll fee.
Ayon sa Alliance of Concerned Truck Owners Organization nag-uusap na ang kanilang miyembro para sa pinaplanong kilos-protesta.
Sinabi ni Connie Tinio, director ng grupo na ang kanilang puwersa ay manggagaling sa iba't ibang exit ng NLEX.
Nahihirapan na aniya ang kanilang grupo sa gastos simula nang ipatupad ang toll hike noong June 16 na mula P19 hanggang halos P100 na dagdag.
Sinabi naman ni Julius Corpuz, spokesman ng Toll Regulatory Board (TRB), na kailangang magpadala ng pormal na petisyon ang ACTOO, pero ang problema ay lumagpas na sa 90-day period na ibinigay sa mga motorista para umapela sa TRB.
Sinabi ni Corpuz na idudulog nila sa kanilang tanggapan ang isyu ng grupo upang matukoy kung puwede pa silang mag-file ng kanilang pagtutol sa toll hike.
Nanawagan ang TRB sa mga trucker na isaalang-alang ang kapakanan ng mga motorista at commuters na posibleng maapektuhan sa kanilang plano.
"Igagalang po namin ang kanilang karapatan upang ilabas ang kanilang saloobin and we are too hopeful na they will be very responsible naman that they will not create inconvenience or discomfort sa ibang motorists," ani Corpuz.
Pinababantayan na ng TRB ang lahat ng exit points ng NLEX at nagpatulong sa Philippine National Police at Metro Manila Development Authority (MMDA).