Dahil sa korupsiyon… IBINULGAR NI CHAVIT: MGA KOREANO, TAKOT SA ‘PINAS

ni Vinia Vivar @Frankly Speaking | October 16, 2025

Photo: Chavit Singson - FB

Dahil sa sunud-sunod na problema ng ating bansa ngayon, naka-hold muna ang mga plano ni dating Ilocos Sur Governor Luis “Chavit” Singson na magdala ng mga South Korean artists dito sa Pilipinas.

“Natatakot na sila ngayon sa mga nangyari,” kuwento ni Manong Chavit nang makausap ng entertainment press during his guesting at Pandesal Forum ng Kamuning Bakery last Tuesday.

Pati nga raw ang plano nila ng South Korean actor na si Lee Seung Gi na pagpapatayo ng isang malaking negosyo sa Pilipinas ay nakabimbin din dahil sa kasalukuyang estado ng ekonomiya natin matapos ang rebelasyon ng malaking katiwalian na nangyari sa flood control projects.

“Pati ang mga fundings ng Korea, pinostpone lahat,” pag-amin niya.

Nagkausap nga raw sila ni Lee Seung Gi at naniniwala nga rin ito na hindi na muna nila dapat ituloy ang plano.

Samantala, sa nasabing Pandesal Forum ay ipinahayag ni Manong Chavit ang kanyang panawagan kay Pangulong Ferdinand “Bongbong” Marcos (PBBM).

“For President Ferdinand Marcos, Jr. to do what is legally and morally right by allowing, instead of hindering, the judicial process to investigate, convict, and punish all the guilty for the crimes of corruption and betrayal of public trust,” ang panawagan ng pulitiko kay PBBM.

“If the President cannot or will not do this, then the President should have the decency and courage to resign and step down as this could be the best legacy he can leave behind — sacrificing his presidency for the good of the Republic he has solemnly sworn to serve,” ang payo pa niya kay PBBM.

Nanawagan din si Manong Chavit ng pagkakaisa sa lahat at i-set aside ang anumang political interests and ideologies at sana’y maging united daw lahat for the love of God and country.

---

SAYA, kilig, drama at aksiyon ang hatid ng mga programa ng GMA Network sa Viu Philippines simula ngayong Oktubre.

Pinangungunahan nina Kapuso Primetime Action Hero Ruru Madrid at aktres na si Kylie Padilla ang nakakakilig at nakaka-in love na TODA One I Love (TOIL). 

Bukod sa love story, nariyan din ang kuwento ng kanilang mga pamilya, pangarap sa buhay at siyempre, ang mga pangyayari sa loob ng TODA o ang Tricycle Operators and Drivers’ Association.

Magsasanib-puwersa naman sina Kapuso Primetime King Dingdong Dantes at Drama King Dennis Trillo sa Cain at Abel (CAA). Gaganap sila bilang magkapatid na pinaghiwalay ng tadhana. Sa kanilang muling pagkikita, haharapin nila ang mga hamon at pagsubok sa pamilya at pag-ibig.

Bukod sa mga ito, mapapanood din nang libre sa Viu Philippines ang iba pang kinagigiliwang Kapuso shows tulad ng Widows’ Web (WW), Hearts on Ice (HOI), Mga Lihim ni Urduja (MLNU), Legal Wives (LG), First Yaya (FY) at marami pang iba.