Cybercrime sa bansa talamak, ingat!

@Editorial | September 17, 2023

Nakababahala ang patuloy na pagtaas ng bilang ng mga kasong may kaugnayan sa cybercrime.

Mismong Philippine National Police ang nagsabi na naglipana ang mga cyber-related crimes sa bansa.

Kaugnay nito, magpapatupad umano ng mas mahigpit na pagbabantay ang pulisya ukol dito.

Tinatarget ang pagtatatag ng Anti-Cybercrime Unit sa bawat police station sa iba’t ibang rehiyon upang mabigyan ng kapasidad ang mga bawat himpilan na labanan ang mga krimen online.

Una nang iniulat ng Presidential Anti-Organized Crime Commission na batay sa kanilang naging monitoring ay mas malala ngayon ang problema ng bansa pagdating sa online scamming kung ikukumpara sa suliranin ng ilegal na droga.

Kung hindi mapipigilan ang paglaganap ng anumang krimen gamit ang internet, ano na ang mangyayari? Bukod sa banta sa ekonomiya, patuloy ding malalagay sa alanganin ang kaligtasan ng mamamayan.

Kaya hamon sa gobyerno na maging mas masigasig at mautak laban sa mga scammer.

Hindi puwedeng pinagtatawanan lang tayo ng mga sindikatong nasa likod ng iba't ibang panloloko.