Cyber threat sa bansa, tapatan ng mas mabigat na parusa

@Editorial | Enero 12, 2024

Mas lumala ang mga cyber attack sa bansa.

Ayon sa Department of Information and Communications Technology (DICT), aabot sa 1,834 cyber incidents ang kanilang natugunan nitong 2023. Mas mataas ito ng 66.44% kumpara sa 1,129 incidents noong 2022.

Patuloy umanong pinaiigting ang hakbang laban sa mga ito sa pamamagitan ng Cybersecurity Bureau-National Computer Emergency Response Team (NCERT).

Umaasa tayo na ang kanilang inilatag na National Cybersecurity Plan (NCSP) 2023-2028 na nakatutok umano sa tatlong strategic outcomes kabilang ang pagpapaigting ng cybersecurity policy framework, at pagpapataas ng cybersecurity workforce capabilities ang tuluyang magpapatigil o kahit makapagpapababa man lang ng mga kaso ng cyber attack.

Kung sa kabila ng dedikasyon ng ahensya sa pagtugon laban sa mga cyber threats, ay namamayagpag pa rin ang mga pag-atake, kailangang mas dagdagan pa ang pagsisikap sa pagtugis at mas bigatan ang parusa.

Huwag sanang balewalain ng kinauukulan ang mga kasong ito na posibleng maglagay sa alanganin sa seguridad ng bansa.