Birth, death at marriage certificates, permanenteng valid na

ni Lolet Abania | August 2, 2022

Permanenteng balido na ngayon ang mga birth, death at marriage certificates na inisyu ng Philippine Statistics Authority (PSA) at ng dating National Statistics Office (NSO).

Ito ay matapos na ang remedial legislation na layon na ang permanent validity ng birth, death, at marriage certificates ay mag-lapse into law noong Hulyo 28, ayon kay Senator Bong Revilla Jr.

Ngayong Martes, nai-share ni Revilla ang isang kopya ng liham mula sa Malacañang na nilagdaan ni Executive Secretary Victor Rodriguez, kung saan ipinababatid sa Senate president ang enactment ng naturang panukala.

Sa isang statement, ipinaliwanag ni Revilla, na siyang sponsor ng batas sa Senate, na ang mga certificates na inisyu, nilagdaan o signed, certified, o authenticated ng Philippine Statistics Authority (PSA), ng dating National Statistics Office (NSO), at ng local civil registries ay binibigyan na ng permanent validity anuman ang petsa ng issuance nito.

Ang mga naturang dokumento ay dapat nang kilalanin o i-recognize at tanggapin sa lahat ng government at private transactions o services na kinakailangan ng submission ng mga ito bilang patunay ng identity at legal status ng isang tao.

Ayon kay Revilla, “The law was legislated to address the growing concern that some government agencies and private institutions requiring the submission of the documents accept only those obtained in the past six months, creating an impression of a six-month validity.”

Sa kabila na nilinaw na ng PSA na ang mga nasabing certificates ay walang expiration, sinabi ni Revilla na ang palagiang pagbabago ng kulay ng security paper ay nagdudulot ng pagtanggi sa pagtanggap ng long-issued documents na mga ito.