Convoy ng militar hinagisan ng granada, 5 nadale

ni Jeff Tumbado @News | July 19, 2026

Photo: CCTV Circulated

Sugatan ang dalawang sundalo at tatlong sibilyan matapos pasabugan ang convoy ng Philippine Army sa kahabaan ng national highway sa Roundball, Barangay Mother Poblacion, nitong Sabado ng umaga.

Ayon sa Police Regional Office-Bangsamoro Autonomous Region (PRO-BAR), alas-6:26 ng umaga nang maganap ang insidente habang sakay ng military truck ang mga tauhan ng 2nd Special Reaction Battalion na patungo sana sa Isulan.

Batay sa paunang imbestigasyon, dalawang hindi pa nakikilalang lalaki na magkaangkas sa isang motorsiklo ang umano’y naghagis ng pinaniniwalaang hand grenade sa military truck bago tumakas.

Agad namang rumesponde ang mga awtoridad at isinugod sa pagamutan ang mga nasugatan. 

Nangyari ang insidente sa ikatlong araw ng pagpapatupad ng election gun ban para sa nalalapit na parliamentary elections ng Bangsamoro Autonomous Region in Muslim Mindanao (BARMM) sa Setyembre 14.

Ayon kay Police Regional Office–BARMM (PRO-BAR) spokesperson Capt. Steffi Salanguit, nagsasagawa na ng imbestigasyon upang madakip ang mga responsable sa krimen.