Construction worker, huli sa sugal, droga

ni Maeng Santos @News | September 7, 2026

Photo: File / PNP Valenzuela City Police Station

Kulong ang isang construction worker na sangkot umano sa droga nang maaresto habang nagsusugal kasama ng isang pedicab driver sa Valenzuela City, kamakalawa ng hapon.

Nagsasagawa ng Oplan Galugad ang mga tauhan ni Valenzuela Police Chief P/Col. Joseph Talento nang maaktuhan nila ang dalawang indibidwal na nagka-cara y cruz sa loob ng isang basketball court sa Cadena De Amor St., Brgy. Balangkas alas-5 ng hapon.

Agad silang nilapitan nina PSSg. Santos at PSSg. Pingad sabay nagpakilalang mga pulis ng Valenzuela Police Sub-Station 5 saka ipinaalam ang kanilang kasalanan bago inaresto.

Nasamsam sa dalawa ang perang taya sa sugal, pangara at isang plastic sachet na naglalaman ng hinihinalang shabu na nakuha umano kay alyas Dominador, 49.