Commercial center, sumabog dahil sa gas leak sa Pagadian City

ni Lolet Abania | November 5, 2022

Isang pagsabog ang naganap sa isang commercial center sa Pagadian City, Zamboanga del Sur, ngayong Sabado ng madaling-araw.

Ayon sa mga awtoridad, wala namang naitalang nasawi o nasaktan sa insidente, na nangyari sa naturang lugar bandang alas-3:55 ng madaling-araw, subalit maraming nawasak na property o ari-arian.

Batay sa ulat ng Police Regional Office 9, nakatanggap ang Pagadian City Police Station (CPS) ng isang tawag mula sa isang concerned citizen at ini-report ang isang explosion na nangyari sa Barangay Santiago.

Sinabi ni TSG John Babon ng Philippine Army EOD, ang pagsabog ay hindi dulot ng isang IED dahil sa wala itong mga traces ng explosives.

“Further, initial findings of arson investigator of Pagadian City Fire Department the cause of explosion is due to LPG gas leak. Continuous fire scene investigation is still being conducted by the BFP personnel inside the building,” pahayag ng Philippine National Police (PNP) PRO9.