Cheloy Garafil, bagong PCO chief – P-BBM

ni Lolet Abania | January 10, 2023

Itinalaga na ni Pangulong Ferdinand “Bongbong” Marcos, Jr. si Atty. Cheloy Garafil bilang secretary ng Presidential Communications Office (PCO).

Batay sa PCO ngayong Martes, si Pangulong Marcos ang nag-administer ng oath of office ni Garafil.

Bago maging kalihim ng ahensiya, si Garafil ay nagsilbing officer-in-charge ng Office of the Press Secretary (OPS).

Noong Hunyo 2022, in-appoint ng Pangulo si Garafil na mamuno sa Land Transportation Franchising and Regulatory Board (LTFRB).

Naglingkod din si Garafil bilang service director sa Committee on Rules ng House of Representatives. Siya rin ay nagsilbi bilang prosecutor sa Department of Justice (DOJ) at State Solicitor sa Office of the Solicitor General (OSG).

Gayundin, si Garafil ay una nang nanungkulan bilang director na may hawak ng media affairs sa panahon ni Senior Deputy Speaker at dating Pangulong Gloria Macapagal-Arroyo noong Speaker pa ito sa lower chamber.