Certificate of Registration ‘di ibibigay kung may paglabag sa Licensure Exam

ni Atty. Persida Rueda-Acosta @Magtanong Kay Attorney | June 20, 2023

Dear Chief Acosta,

Pumasa ang aking kasintahan sa Licensure Examination for Interior Designers ngunit ayaw siyang isyuhan ng Certificate of Registration ng Board of Interior Design.

Ayon diumano sa Board, may nakuhang cellphone sa kanya noong nakaraang examination na ipinagbabawal sa pangkalahatang tagubilin sa pagsusulit. Hindi naman niya ginamit ang nasabing gadget upang mandaya. Napatunayan ito pagkatapos ng imbestigasyon ng Board. Tama po ba ang kanilang ginawa? - Zyra

Dear Zyra,

Para sa iyong kaalaman, ang batas na nakasasaklaw sa iyong katanungan ay ang Republic (R.A.) No. 10350 na mas kilala sa tawag na “Philippine Interior Design Act of 2012”. Nakasaad dito na:

“Section 21. Refusal to Register. - The Board shall not register any successful applicant for registration who has been:

(c) Adjudged guilty for violation of the General Instructions to Examinees by the Board.”

Ayon sa nasabing batas, maaaring hindi maisyuhan o irehistro ang isang taong nakapasa sa Licensure Examination for Interior Designers kung mayroon siyang nilabag sa pangkalahatang tagubilin patungkol sa pagsusulit. Nakasaad din sa Implementing Rules and Regulations (IRR) ng nasabing batas ang mga kapangyarihan at responsibilidad ng mga miyembro ng Board:

“Section 10. Powers, Functions, Duties and Responsibilities of the Board. The Board shall exercise the following specific powers, functions, duties and responsibilities:

(d) Issue, suspend, revoke or reinstate the certificate of registration or professional license for the practice of the interior design profession.”

Samakatuwid, ang pangalan ng iyong kasintahan ay maaaring hindi mairehistro kahit siya ay pumasa sa pagsusulit, kung batay sa nakaraang desisyon ng Board ay mayroon siyang ginawang paglabag sa nabanggit na batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.