CCS magpapatibay pero babawi ang Speed Hitters

ni Gerard Arce @Sports | July 13, 2023

Mas lalo pang patitibayin ng defending champions Creamline Cool Smashers ang pagkakahawak sa liderato katapat ang mas pinalakas na PLDT High Speed Hitters para sa karapatan na makuha ang top spot ng grupo sa Pool A patungo sa mas kaabang-abang na semis ng 2023 Premier Volleyball League (PVL) Invitational Conference ngayong araw sa Philsports Arena sa Pasig City.

Target ng Cool Smashers na makuha ang 3-0 kartada upang lumapit sa pagiging unang koponan na makakuha ng semis berth kasunod ng impresibong pangwawalis sa Chery Tiggo Crossovers at Gerflor Defenders.

Maghaharap ang Cool Smashers at High Speed Hitters ng 4 p.m. na susundan ng huling laro ng 6:30 p.m. sa pagitan ng wala pang panalong Farm Fresh Foxies at Cignal HD Spikers. Subalit bago rito ay maghahambalusan muna sa pambungad na laro sa quadruple-header ang Gerflor at Chery Tiggo sa 9:30 am. na susundan ng Pool B leader na F2 Logistics Cargo Movers at Petro Gazz Angels.

Kinakailangang masigurado ng CCS ang ikatlong panalo nito upang masigurado ang dalawang slot para sa semis na muling pagbibidahan nina 3-time conference MVP Diana Mae “Tots” Carlos, Jema Galanza, Ced Domingo, Michelle Gumabao, Jia De Guzman, at Alyssa Valdez.

Inaasahang makababalik na sa paglalaro sina middle blocker Mika Reyes at Mean Mendrez mula sa injuries. Nasa huling estado na ng kanyang recovery si Reyes sa kanyang shoulder injury, habang may minor knee injury naman si Mendrez. “Mean just had a recent knee issue, but it's not a big concern. Mika is still recovering from her shoulder, but she's doing well and able to keep up with the training,” wika ni head coach Rald Ricafort na nagawang makuha ang unang panalo sa bisa ng 25-15, 25-19, 25-22 laban sa Akari Chargers.