Casimero, dedepensahan ang korona vs. Rigondeaux

ni Gerard Arce - @Sports | August 12, 2021

Nakahanda ng idepensa ni World Boxing Organization (WBO) bantamweight champion “Quadro Alas” John Riel Casimero ang kanyang korona laban sa delikado at beteranong two-time Olympic gold medalist na si Guillermo Rigondeaux sa Sabado ng gabi (Linggo ng umaga sa Pilipinas) sa Dignity Health Sports Park sa Carson, California.

Kumpiyansa ang 31-anyos mula Ormoc City na maaaring maging madali para sa kanya ang laban sa Cuban champion na hawak din ang World Boxing Association (WBA) 118-pound regular-world title.

Sinabihan niya ang 40-anyos na decorated amateur titlist na nagwagi ng gintong medalya sa 2000 Sydney at 2004 Athens Olympics na ipakita at ilabas ang lahat ng tibay at magandang laro para sa kani-kanilang mga tagasubaybay at tagahanga.

“I know that I can make this an easy fight for myself. I want him to have some guts and be the exciting fighter he’s shown recently. It will be better for the fans and it will really prove who is the best,” wika ni Casimero para sa kanilang main event bout sa pagtutulungan ng Showtime Championship Boxing at Premier Boxing Champions. “This has been a fantastic training camp. I’ve really been focusing on my conditioning so that I can keep my strength for all 12 rounds. This has been the best training I’ve had in a while, because for this fight I had a set date and plenty of time. For my last fight, the date was changed because of the pandemic and that was difficult to work through. But this camp has been very smooth.”

Umaasa si Casimero na sa oras na daigin niya ang Cuban boxer ay maaaring mapabilang siya sa pinakamahuhusay na bantamweight boxers, kung saan target nitong makuha ang mga titulo at makaharap si unbeaten at unified 118-lb champion “Monster” Naoya Inoue ng Japan.