Caloocan Girl, suportado sa Metroturf Malvar Race

ni Green Lantern - @Renda at Latigo | July 20, 2022

Anim na kabayo ang magtatagisan ng bilis sa PHILRACOM Rating Based Handicapping System na pakakawalan sa pangatlong karera ngayong araw sa Metro Turf, Malvar - Tanauan City, Batangas.

Posibleng makakuha ng malaking suporta sa mga karerista si Caloocan Girl na rerendahan ni dating Philippine Sportswriters Association, (PSA) Jockey of the Year awardee Patty Dilema.

May distansiyang 1,200 meter race, makakatagisan ng bilis ni Caloocan Girl sina Midnight Sonata, Prince Uno, Lady Zip, Effen Herstal at Hot Rot Hearts.

Komento ng ibang mga karerista, maaaring magbigay ng magandang laban si Hot Rot Hearts na sasakyan ni Rodeo Fernandez.

Nakalaan ang added prize na P25,000 na ikakalat sa unang apat na kabayong tatawid sa meta habang kukubrahin ng winning horseowner ang karagdagang premyo na P5,000.

Pitong karera ang inihain ng Metro Manila Turf Club Inc. (MMTCI) ngayong araw kaya paniguradong masisiyahan ang mga karerista sa kanilang paglilibang.

Suportado ng Philippine Racing Commission, (PHILRACOM) sa pamumuno ni chairman Reli De Leon ang nasabing mga races.

Samantala, nagdeklara ng pagsali si Winged Heart sa 3-Year-Old Locally Bred Stakes race na ilalarga sa darating na Linggo sa Santa Ana Park sa Naic, Cavite.

Lalabanan ni Winged Heart ang walong matitikas na kabayo sa karerang nakalaan ang P1M guaranteed prize na ipamumudmod sa unang anim na kabayong tatawid sa meta sa distansiyang 2,000 meter race.

Gagabayan ni Pablito Cabalejo, makakalaban ni Winged Heart sina Colony Bell, Full Combat Order, King Hans, Lauriatisimo, Queen Louise, Saoirse, Thermodynamics at Victoriousprincess.

Ibubulsa ng mananalong kabayo ang P600,000, kukubrahin ng 2nd placer ang P200,000, mapupunta sa 3rd ang P100,000 habang tig-P50,000, P30,000 at P20,000 ang 4th hanggang 6th ayon sa pagkakahilera.

Mga Pili ni Green Lantern:

Race 1 - Tomorrow Land (4), Huckleberry (6)

Race 2 - Say Something (6), Kid Kenshin (5)

Race 3 - Caloocan Girl (6), Hot Rot Hearts (5)

Race 4 - Winning Move (8), Charm N' Luck (6) Classy Babe (4)

Race 5 - Et Tu Brute, (5), Light And Shade (2)

Race 6 - To Its Si Bing (6), Smiling Lady, (3), Sky Dancer (4)

Race 7 - Phenom (9), Yabba Dabba Doo (6), Rafa/Baling Rikit (2/2A)