Buwis-buhay sa kalsada dahil sa mga lubak

by Info @Editorial | September 25, 2026

Hindi simpleng abala ang mga lubak sa kalsada. Kapag ang isang motorista ay sumemplang, nasagasaan o namatay dahil sa lubak na matagal nang hindi inaayos, usapin na ito ng kaligtasan at pananagutan. 

Ang kalsadang pinababayaang sira ay panganib na hinahayaang manatili sa mismong dinaraanan ng publiko.

Taun-taon, may pondong inilalaan para sa paggawa, pagkukumpuni at maintenance ng mga kalsada. Kaya hindi katanggap-tanggap na may mga lubak na lumalaki at lumalalim bago pa mapansin o aksyunan. 

Hindi dapat hintaying may maaksidente bago maglatag ng babala, magtambak ng aspalto o magsagawa ng permanenteng pagkukumpuni.

Mas lantad sa panganib ang mga nakasakay sa motorsiklo. Isang malalim na lubak na mahirap makita sa gabi o natatakpan ng tubig kapag umuulan ay maaaring sapat upang mawalan ng kontrol ang isang rider. Sa ganitong sitwasyon, ang kapabayaan sa kalsada ay hindi na maliit na pagkukulang—maaari itong magkaroon ng kapalit na buhay.

Kaya sa mga lokal na pamahalaan at iba pang ahensiya ng gobyerno na may responsibilidad sa mga lansangan: aksyunan na ang mga lubak bago pa may sumunod na madisgrasya. Inspeksyunin, kumpunihin at panagutin ang dapat managot sa palpak o mabagal na trabaho. 

Hindi dapat maging death trap ang kalsadang binabayaran at ginagamit araw-araw ng mamamayan.