Bukod sa GF na si Ysabel… MIGUEL, GANDANG-GANDA KINA MARIAN, KRISTINE AT MYLENE

ni Mercy Lejarde @Talkies | August 5, 2026

Photo: IG _migueltanfelix

Bukod sa kanyang girlfriend na si Ysabel Ortega, ibinahagi ng aktor na si Miguel Tanfelix ang kanyang Top 3 na pinakamagagandang Pinay actresses sa isang panayam.

Ayon kay Miguel, ang kanyang mga napili ay sina Marian Rivera, Kristine Hermosa, at Mylene Dizon.

Nang tanungin kung bakit sila ang kanyang mga choice, sinabi niyang si Marian ang kanyang No. 1 dahil sa tingin niya ay napakaganda nito. Samantala, inilarawan naman niya si Kristine bilang may ‘classic beauty’. 

Si Mylene naman ay napili niya dahil aniya, medyo magkahawig ito at ang kanyang mommy.

In fairness kay Miguel, ang ganda ng taste niya pagdating sa magagandang babae. Sa true lang…

---

MALAPIT nang ilunsad ang PinaSexy Challenge (PC), isang exciting challenge series na magtatampok sa walong kilalang social media personalities na magpapakitang-gilas sa iba’t ibang masaya, nakakakaba at hindi inaasahang hamon.

Kabilang sa mga tampok na influencers sina Vannesa Raval, Queen Money, DJ Justine Joyce Dayag, Trixie Escosis, Tei Escosis, Aki Mitu, Nikkie Millares, at Eunice Andrea.

Sa katatapos lamang na pocket press conference ng PC na ginanap sa Ayala Feliz, nakapanayam ng media ang ilan sa mga sikat na influencers na kabilang sa mga sasabak sa naturang reality challenge.

Sa panayam, ibinahagi ng mga kalahok ang mga dapat abangan sa PC, pati na rin kung sino ang kanilang nais na makapareha sakaling mabigyan ng pagkakataong magkaroon ng love team.

Ayon kay Eunice Andrea, si Donny Pangilinan ang nais niyang maging ka-love team.

“Kung mabibigyan po ako ng ka-love team, ang gusto ko po talaga ay si Donny Pangilinan. Pinag-aagawan po namin s’yang tatlo, pero sana, ako ang piliin,” ani Eunice habang natatawa.

Dagdag pa niya, hindi lamang tungkol sa pagiging ‘sexy’ ang ipinapakita ng show.

Aniya, “Aabangan po nila sa PinaSexy Challenge na ang ibig sabihin ng ‘sexy’ ay ‘di lang panlabas na anyo. Mas ipinapakita rito ang lakas ng karakter. Palakasan ito ng stamina at strength. Iba talaga ang mga challenges na ipinagawa sa amin—sobrang challenging talaga. Sigurado akong matutuwa kayo sa mga makikita at mapapanood ninyo.”

Samantala, inamin ni Aki Mitu na matagal na niyang crush ang aktor na si Donny at ito rin ang nais niyang makapareha kung mabibigyan ng pagkakataong magkaroon ng love team.

“Ang gusto kong maka-love team ay si Donny Pangilinan kasi super crush ko po talaga s’ya. Kaso may Belle (Mariano) na s’ya at bagay na bagay talaga sila,” ani Aki.

Pabiro pa niyang idinagdag, “Kung magkakaroon ng pagkakataon, gusto ko s’yang mapangasawa.”

Ibinahagi rin ni Aki ang mensaheng nais iparating ng PC, kung saan aniya, hindi lamang panlabas na kagandahan ang ipinapakita ng programa.

Saad ni Aki, “Abangan ninyo ang PinaSexy Challenge. Dito ninyo makikita na ‘pag sinabi mong sexy, ito ay ang lakas ng babae, ang kanyang tapang, determinasyon, at ‘di pagsuko. ‘Yan ang tunay na kahulugan ng pagiging sexy na makikita ninyo sa PinaSexy Challenge.”

Para naman kay Trixie Escosis, wala pa siyang naiisip na gustong maka-love team.

Sey niya, “Sa love team, wala pa po akong idea. Natutuwa ako na si Donny Pangilinan ang type nila, pero sa akin, wala pa talaga akong naiisip.”

Ayon kay Trixie, ibang bersiyon ng kanyang sarili ang mapapanood ng publiko sa reality challenge.

Aniya, “Siguro, ang aabangan ninyo sa PinaSexy Challenge ay ibang Trixie. Makikita ninyo akong palaban pero at the same time, ine-enjoy ang journey at ang friendly competition. Nakakatuwa kasi ibang version ko ‘to, at gusto ko rin itong i-share sa inyong lahat. Sana, magustuhan n’yo ang makikita ninyo.”

Sa nasabing panayam, napag-usapan din ang husay sa pagdidirek at magandang pakikitungo ng actress-director ng PC na si Kristel Moreno.

Nagkaisa sina Eunice Andrea, Aki Mitu at Trixie Escosis sa paghanga kay Direk Kristel. Ayon sa kanila, bukod sa husay nito sa pagdidisenyo at pangangasiwa ng mga hamon sa programa, kapansin-pansin din ang pagiging mabait, approachable, at pala-kaibigan nito sa buong cast.

“Idol ko si Direk (Kristel). Sobrang idol ko po s’ya at ang bait n’yang direktor. ‘Di mo mararamdaman na direktor talaga s’ya dahil parang tropa lang s’ya ‘pag kasama mo,” saad ng mga kalahok.

Nagpasalamat din sila kay Direk Kristel sa pagkakataong maging bahagi ng programa.

“Nagpapasalamat ako kay Direk sa experience. Sobrang nag-enjoy po talaga kami. Very grateful ako kay Direk dahil napaka-approachable niya,” dagdag pa nila.

Well, saksi si yours truly sa tunay na ugali ni Direk Kristel, kung gaano siya kabait, lalo na bilang isang anak.

Kaya naman hindi nakapagtatakang super-proud ang kanyang mother dearest na si Annabelle Valdes Moreno. Talagang makikita ang ganda ng pagpapalaki niya kay Direk Kristel. ‘Di ba naman, Mommy Anna?

Anyway, patuloy na ang paghahanda para sa opisyal na premiere ng PinaSexy Challenge. Abangan ang mga susunod na anunsiyo at updates sa official social media pages nito.

‘Yun lang, and I thank you.