Bomogao astig pa rin, bumira ng ika-3 panalong TKO sa ONE

ni Gerard Arce @Sports News | June 9, 2025

Photo: Sapul ng malakas na sipa sa mukha ni Islay Erika Bomogao si Nerea Rubio ng Spain sa first round ng laban nilang ito sa Thailand. (FB)

Bumira ng matinding kombinasyon si 'Team Bagsik' member Islay Erika Bomogao upang maagang pataubin ang Espanyol na katapat na si Nerea Rubio sa bisa ng first round TKO sa kanilang catchweight 103-pounds women's Muay Thai match sa ONE Friday Fights 111, Biyernes ng gabi sa Lumpinee Stadium sa Bangkok, Thailand.

Masusing pinag-aralan at ginampanan ng miyembro ng Philippine Muay Thai team ang katapat upang maitarak ang ikatlong sunod na panalo sa muling pagbabalik ng mga upakan sa Thailand matapos makansela ang  unang paghaharap dulot ng lindol doon.

Muling nagpasikat ang 2021 SEA Games  gold medalist ng impresibong panalo nang tapusin ang Spanish fighter sa 1:05 ng first round dulot ng malupit na body shot.

Maagang bumitaw ng malulutong na upak ang 24-anyos na Igorota fighter mula Baguio City na sinundan ng pagtuhod sa sikmura, subalit natigil matapos silang matumba.

Ginulantang ni Bomogao ng isang matinding front kick sa mukha ang Espanyola at sinundan ng malupit na kanang straight sa tagiliran at left kick sa katawan na senyales ng pagtupi mula sa tinamong suntok.

Nagawang bilangan ni referee Watcharaphorn “Pao Fan” Pachumchai ang napaupong si Rubio, subalit hindi na nagawa pang bumangon upang tuluyang itigil ang laban na nagresulta sa first round stoppage upang lumapit sa kanyang inaasam na kontrata sa ONE Championship.

“It feels fantastic. I trained for so long for this, all my hard work paid off,” pahayag ni Bomogao sa post-fight interview. “Definitely the body shot, was something that me and my team have been really working on and honestly I didn’t really expecting that fast, but I’m really thankful It did,” dagdag ng Pinay fighter na tatanggap rin ng bonus na 350,000 Thai baht o halos P600,000 sa Philippine peso.