Bodega ng ukay-ukay nilooban, 3 tiklo

ni Maeng Santos @News | August 12, 2026

Photo: File

Arestado ang tatlong kawatan na sinamantala ang malakas na ulan para pasukin at looban ang isang bodega sa Malabon City.

Sa kanyang ulat kay Northern Police District (NPD) Director P/BGen. Benliner Capili, kinilala ni Malabon Police Chief P/Col. Kenneth Mission ang mga suspek na sina alyas Jr Topeng, 24; Boni, 26, at Johan, 24, pawang residente ng Brgy. Tonsuya.

Sa imbestigasyon nina P/MSg. Ernie Baroy at P/MSg. Diego Ngippol, nakapasok sa bodega na nasa P. Aquino Avenue, Brgy. Longos ang mga kawatan nang wasakin ang bahagi ng pader na tinakpan lang ng yero bago lumabas, tangay ang mga ninakaw.

Nagkataon namang gising pa ang testigong si alyas Ric, 41, na nakatira sa tabi ng bodega na agad tumawag sa Malabon Police Sub-Station-5 nang masaksihan ang panloloob na nagresulta sa pagkakaaresto sa mga suspek.

Nabawi sa kanila ang dalawang sako ng hanger na nagkakahalaga ng P16,000 at isang sako ng ukay-ukay na mga damit na nagkakahalaga ng P3,000.