Blue Eagles, tinalo ang Israel, palalakasin sa UAAP

ni Gerard Arce - @Sports | September 5, 2022

Mas patitibayin at palalakasin ni Ateneo De Manila Blue Eagles head coach Tab Baldwin ang kanilang paghahanda sa 85th University Athletic Association of the Philippines (UAAP) men’s basketball tournament sa pagsabak sa dalawang tune-up matches sa bansang Israel.

Ang pangunahing layunin ng dating three-peat champions na mabuo ang koponan mula sa simula na planong mas patibayin ang kanilang opensiba at paglilinis ng depensa ng Blue Eagles sa Tel Aviv.

“We only have a couple of games. We are going there to flesh out our system even more. We need more offensive attacks and defensive sophistication,” wika ni Baldwin na nakatakdang sumabak sa dalawang Division 2 na koponan sa Israel.

Tinalo ng Blue Eagles ang A.S. Ramat HaSharon nitong Sabado ng gabi sa iskor na 73-69 kasunod ng pagbabayani ni Dave Ildefonso at BJ Andrade at sunod na kakaharapin ang Elitzur Eito Ashkelon sa Zysman Arena sa Lunes sa parehong oras na parehong matutunghayan sa SMART Sports' Facebook page.

Bago maglaro ang Ateneo sa Israel, sumabak sa apat na laro ang Blue Eagles mula sa tatlong laro at kampeonato sa World University Basketball Series sa Tokyo at ang tune-up laban sa East Asia Super League squad Bay Area.

Tinukoy din ng dating national team head coach na mas plano niya ring mas mapabuti ang laro ng Blue Eagles bilang preparasyon at planong mabawi ang koronang nawala laban sa defending champions UP Fighting Maroons.

“Just got to get a lot better. We have had such a disruptive buildup in June and July because of injuries. Ange [Kouame] just came back, Dave [Ildefonso] has only been back a couple of weeks.

Same with Matthew Daves,” pahayag ng dekoradong coach.