Bisa at pagpapatupad ng kasunduan sa barangay

ni Atty. Persida Rueda-Acosta @Magtanong Kay Attorney | May 8, 2023

Dear Chief Acosta,

Nagkaroon kami ng kasunduan ng aming kapitbahay hinggil sa nasirang bahagi ng aming gate sanhi ng pagkakabangga ng kanilang motor. Matapos ang apat na buwan, hindi pa rin nila tinupad ang kanilang pangako. Sinabihan nila ako na wala namang bisa ang aming nilagdaan sa barangay, kaya hindi ko sila mapipilit ukol dito. Tama ba sila? May paraan bang maipatupad ko ito? –Au

Dear Au,

Para sa iyong kaalaman, ayon sa Artikulo 416 at 417 ng Republic Act No. 7160 o mas kilala bilang Local Government Code of the Philippines, as amended:

“SEC. 416. Effect of Amicable Settlement and Arbitration Award. - The amicable settlement and arbitration award shall have the force and effect of a final judgment of a court upon the expiration of ten (10) days from the date thereof, unless repudiation of the settlement has been made or a petition to nullify the award has been filed before the proper city or municipal court. However, this provision shall not apply to court cases settled by the lupon under the last paragraph of Section 408 of this Code, in which case the compromise settlement agreed upon by the parties before the lupon chairman or the pangkat chairman shall be submitted to the court and upon approval thereof, have the force and effect of a judgment of said court.

SEC. 417. Execution. - The amicable settlement or arbitration award may be enforced by execution by the lupon within six (6) months from the date of the settlement. After the lapse of such time, the settlement may be enforced by action in the appropriate city or municipal court.”

Samakatuwid, ang inyong kasunduan sa inyong barangay ay may bisa rin na kahalintulad sa desisyon ng isang hukuman. Sampung araw mula ng inyong pagkakasundo ay maaari na itong maipatupad, maliban na lamang kung ito ay ipinawalang-bisa sa nararapat na hukuman o ito ay hayagang itinanggi ng iyong kapitbahay sa loob ng 10 araw. Maaari mong ipatupad ang inyong kasunduan sa barangay matapos ang 10 araw, sa loob ng anim na buwan sa pamamagitan ng mga proseso ng pagpapatupad at paniningil (execution) sa barangay. Pagkalagpas ng panahong ito, kinakailangan mo nang magsampa ng naaayong aksyon o kaso sa Municipal o Metropolitan Trial Court na nakasasakop sa inyong lugar upang maipatupad ang inyong naging kasunduan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.