Big hook, markado sa Santa Ana Race

ni Green Lantern - @Renda at Latigo | July 3, 2022

Pitong kabayo ang magtatagisan ng bilis sa PHILRACOM Rating Based Handicapping System na ilalarga ngayong araw sa Santa Ana Park sa Naic, Cavite.

Markado sa laban si Big Hook na sasakyan ni Jomer Estorque, posibleng maging mahigpit nilang karibal ay ang magka-kuwadrang Signature Move at Heirlom na rerendahan nina RC Baldonido at AM Tancioco ayon sa pagkakasunod.

Naniniwala ang ibang karerista na liyamado sa laban si Big Hook pagsimula ng bentahan sa Race 1 mamayang 4 p.m.

Maliban kina Signature Move at Heirlom, ang ibang kalahok sa distansiyang 1,300 meter race ay sina Don Damiano, Happy Kid, Jade's Treasure at Arrows Up. "Patok 'yan si Big Hook, single ako sa kanya sa winner take all," saad ni Jomar Cordero, veteran karerista na taga-Tayuman.

Nakalaan ang P25,000 added prize na ikakalat sa unang apat na kabayong tatawid sa meta.

Kukubrahin din ng mananalong kabayo ang karagdagang premyo na P5,000 sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, tiyak na aabangan din ng mga karerista ang Condition Race na paglalabanan ng anim na tigasing kabayo. Sa pang-anim na karera pakakawalan ang nasabing race, ang mga kasali ay sina Sweetness, Konzeelanz, Oakhill Princess, Lion's Gate, Lady Arya at Shalom.

May distansiyang 1,000 meter ang karera kaya asahang kaskasan ang mga kabayo paglabas ng aparato.

Mga Pili ni Green Lantern:

Race 1 - Big Hook (3), Signature Move/Heirlom (1/1A), Don Damiano (2)

Race 2 - Speedy Wego (4), Dimakya Island (5)

Race 3 - Pilya (6), Red Hawk (3)

Race 4 - Cannon Ball (4), Lady Goldie (7), Maam Aida (1)

Race 5 - Shine (4), Lady Of Peace (5)

Race 6 - Sweetness (1), Oakhill Princess (3)

Race 7 - Northern Fame (1), Extremely Tough (7)