Biding-bidingan sa gov’t projects, wakasan

by Info @Editorial | September 27, 2025

Isang nakakagulat pero hindi na rin bago na halos 100% ng mga proyekto ng gobyerno, luto na ang bidding.Sistemang bulok, proyektong peke, at bilyong pisong ninanakaw gamit ang serbisyo-publiko. 

Sa halip na maayos na flood control, may ghost projects. Imbes na patas na bidding, may hatian at sindakan na mala-sindikato ang galawan.Ito ang reyalidad: ang gobyerno, hindi lang palpak — kundi sinadyang ginagawang negosyo ng iilan.Sino ang kawawa? Taumbayan. Ang mga nagbabayad ng buwis. 

Mula noon hanggang ngayon, ang mga Pilipino ay paulit-ulit na niloloko, pinapangakuan, pero walang natatanggap kundi baha, trapik, at mahal na bilihin.Paulit-ulit ang imbestigasyon, pero walang tuluyang nabubulok sa kulungan. 

Panahon na rin para ang malalaking isda ang mahuli. 

Kailangang pangalanan at kasuhan ang mga nasa likod ng malawakang korupsiyon.

Kung wala tayong gagawin, kasabwat na rin tayo sa bulok na sistema sa gobyerno.