Beauty Queen at mister, kulong sa pagnanakaw ng $1.7M wine

ni Ejeerah Miralles (OJT) | March 8, 2023

SPAIN — Nahatulan ng 4 na taong pagkakakulong ang mag-asawa matapos magnakaw ng 45 boteng wine na nagkakahalaga ng nasa $1.7 milyon (£1.4 milyon).

Kinilala ng korte ang mga suspek na sina Tatania at Estanislao, ngunit nakilala sila ng media bilang sina Priscila Guevara, dating Mexican beauty queen, at si Constantin Dumitru.

Ayon sa awtoridad, matapos kumain sa isang Michelin star restaurant ay nag-tour ang mga suspek sa wine cellar. Bumalik umano si Estanislao ng madaling-araw para i-raid ang cellar gamit ang nanakaw na susi at kalaunan ay tumakas dala-dala ang mga naturang wine.

Ipinag-utos naman ng korte ang pagbabayad ng mga suspek ng higit €750,000 danyos.

Samantala, hindi pa pinal ang kanilang sentensiya at may pagkakataon pa ang mga suspek na umapela.