BDO, pinarangalan bilang ‘top graduate employer’ ng GradPhilippines

ni Fely Ng - @Bulgarific | July 12, 2021

Sa gitna ng pandemya, pinaghuhusay ng BDO ang paggamit ng mga digital na paraan upang mahikayat ang mga bagong talento na sumali sa organisasyon. Sa kasalukuyan, naghahanap ito ng Online Account Officers na kayang magbigay ng mahusay na serbisyo-online para sa mga kliyente ng bangko. Hinihikayat ng BDO ang sinumang may background sa customer service, kabilang ang mga dating cabin crews, hoteliers, at iba pang customer-facing professionals, na magpadala ng CV na may larawan sa tallada.airish@bdo.com.ph.

Hello, Bulgarians! Ang BDO Unibank ay isa sa mga nangungunang employer para sa mga bagong graduate sa bansa. Ang bangko ay itinanghal na Top Graduate Employer in the Banking and Financial Services Sector at nasa ikalimang puwesto naman sa listahan ng Top 100 Graduate Employers sa Pilipinas na inilabas ng GradPhilippines.

Ang Top 100 Graduate Employers List ay nagraranggo ng mga kumpanya batay sa kanilang popularidad sa mga web search at pangkalahatang marka sa mga nangungunang job websites sa bansa. Ang GradPhilippines ay nagsasagawa ng komprehensibong pagsusuri upang mahusay na mabuo ang listahan nito, kasama na ang pagsusuri at pagsasama-sama ng data mula sa mga search engine, bilang ng bumibisita sa webpage, at mga review ng empleyado.

Ayon sa GradPhilippines, mahigit 600 kumpanya sa Pilipinas ang kinonsidera bago mabuo ang huling listahan. Kasama sa pamantayan ang pag-post sa mga employment websites ng mga oportunidad para sa mga bagong nagsitapos; pag-post ng mga bakanteng trabaho o internship sa anumang site ng Prosple noong 2020; at pagkakaroon ng higit sa limang search request sa GradPhilippines.com.

“Itinuturing ng BDO ang mga empleyado bilang pinakamahalagang asset nito. Nabigyan nito ng trabaho ang higit sa 38,000 propesyunal mula sa iba’t ibang background at larangan. Salamat sa mga taong ito, natutupad ng bangko ang pangako nitong ‘We find ways’ para sa mga kliyente araw-araw,” sabi ni Evelyn Salagubang, BDO Senior Vice President and Head of Human Resources Group.

“Patuloy naming pinagbubutihan ang aming paghahanap upang maanyayahan ang mga pinakamagagaling na propesyunal sa bansa na sumali sa organisasyon at sa proseso, matulungan namin silang pagyamanin ang kanilang karera. Ipinagmamalaki naming marami sa mga empleyado ang kasama namin sa loob ng ilang dekada na, ang ilan ay mula pa nang nagtapos sila sa kolehiyo. Nagpapasalamat kami sa patuloy na katapatan at ambag ng aming mga empleyado sa tagumpay ng BDO.”

Ang GradPhilippines ay bahagi ng Prosple group na nagbibigay sa mga nagtapos sa buong mundo ng mga kaalaman at pamamaraan upang matulungan silang makamit ang pinakamahusay na pagsisimula sa kanilang karera. Ang Prosple ay mayroong higit sa 180 career at study websites sa buong Australia, New Zealand at rehiyon ng Timog-silangang Asya.

Simulan ang iyong tagumpay sa BDO

Nangungunang Employer. Ang BDO ay itinuturing na Top Graduate Employer sa sektor ng Banking and Financial Services at ikalima naman sa Top 100 Graduate Employers ng GradPhilippines.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.