ni Jeff Tumbado | March 21, 2023
Naglabas ng bagong board resolution ang Land Transportation Franchising and Regulatory Board (LTFRB) na makatutulong sa mabilis na pagresolba ng mga kaso sa sektor ng transportasyon upang mabawasan ang mga ilegal na aktibidad o red tape.
Sa Board Resolution No. 008 Series of 2023, napagpasyahan na pahintulutan pa ang hepe ng Legal Division ng Board na pirmahan at aprubahan ang lahat ng mga utos o resolusyon para sa Inspection Report Summons apprehension cases na tinatanggap at hindi tinututulan ng mga respondent, maliban sa mga walang prangkisa o Certificate of Public Convenience (CPC) o Evidence of Franchise na iprinisenta sa panahon ng panghuhuli.
Sa ilalim ng bagong resolusyon ng Board, kasama na ang mga kaso tulad ng Colorum Violation, at Fraud and Falsities gaya ng pagpapakita ng peke at huwad na CPC, Official Receipt (OR) o Certificate of Registration (CR), plates, stickers at mga tag, sa mga kaso ng pagdakip sa Inspection Report Summons (IRS), na dating exempted o hindi kasali sa ilalim ng Board Resolution No. 190, Series of 2022 na inisyu noong nakaraang Disyembre 27, 2022.
Ayon sa LTFRB, ang desisyon na muling suriin ang Board Resolution No. 190 upang isama ang colorum at peke na mga CPC sa listahan ng mga IRS apprehension case ay bahagi ng pangako ng ahensya na sumunod sa Republic Act 11032 o ang “Ease of Doing Business and Efficient Government Service Delivery Act of 2018”.
Kabilang sa mga layunin ng RA 11032 ay gawing simple ang mga pamamaraan upang mabawasan ang red tape sa paghahatid ng serbisyo-publiko.
“We included colorum and fake CPCs in the list of IRS apprehension cases because the commuting public deserves it. By expanding the list of IRS apprehension cases, it also helps the Board reduce the level of case resolution backlogs for speedy delivery of service, which is what RA 11032 is all about,” pahayag ni LTFRB Chairman Atty. Teofilo Guadiz III.