Mas mabigat na parusa sa pabayang gun owner — DILG

ni Jeff Tumbado @News | August 20, 2026

Photo: Sec. Jonvic Remulla - DILG

Nanawagan si Department of the Interior and Local Government (DILG) Secretary Jonvic Remulla sa Kongreso na pag-aralan ang posibilidad na amyendahan ang umiiral na batas upang mas malinaw na mapanagot ang mga may-ari ng baril kapag nagamit sa krimen ang kanilang mga armas dahil sa kapabayaan sa pag-iingat.

Ayon kay Remulla, dapat isaalang-alang ang paggawa ng panibagong batas o pagbabago sa kasalukuyang mga probisyon upang matiyak na may pananagutan ang mga gun owner na hindi maayos na nag-iingat ng kanilang mga baril.

Sa ilalim ng Republic Act No. 10591 o Comprehensive Firearms and Ammunition Regulation Act, may responsibilidad ang mga rehistradong may-ari na tiyaking ligtas at secure ang kanilang mga baril.

Gayunman, hindi awtomatikong mananagot sa krimen ang may-ari kung ginamit ng ibang tao ang kanyang lisensyadong baril.

Kailangan munang mapatunayan ang direktang partisipasyon ng may-ari o ang pagkakaroon ng kapabayaan, kabilang ang tinatawag na criminal negligence, bago siya maaaring papanagutin sa ilalim ng umiiral na batas.

Muling nabigyang-pansin ang usapin matapos makumpirma ng Bureau of Customs na isa sa mga baril na ginamit sa insidente ng pamamaril sa isang paaralan sa Zamboanga City ay kabilang sa mga armas na iniimbestigahan ng mga awtoridad.

Giit ni Remulla, hindi lamang pribadong usapin ang wastong pag-iingat ng baril dahil maaari itong maging banta sa seguridad ng publiko kapag napunta sa kamay ng ibang tao.

Dahil dito, nais ng DILG na pag-aralan ng Kongreso ang posibleng mga pagbabago sa batas upang mapalakas ang pananagutan ng mga may-ari ng baril at maiwasan ang paggamit ng mga rehistradong armas sa mga krimen.

Car, motorcycle dealers na pasaway sa rehistro, lagot sa LTO

ni Jeff Tumbado @News | July 24, 2026

Photo: File

Nagbabala ang Land Transportation Office (LTO) na papatawan nito ng mahigpit na parusa ang mga accredited car at motorcycle dealers na mapatutunayang paulit-ulit na lumalabag sa mga patakaran sa pagpaparehistro ng mga bagong sasakyan na nagiging dahilan ng pagkaantala sa paglabas ng Official Receipt (OR), Certificate of Registration (CR), at rehistradong plaka.

Ito ang naging direktiba ni LTO Chief Assistant Secretary Markus V. Lacanilao, sa ginawang pagpupulong sa mga kinatawan ng mga accredited car at motorcycle dealers sa LTO Central Office sa East Ave., Quezon City.

Sa pulong, sinabi ni Lacanilao na obligasyon ng bawat accredited dealer na tiyaking kumpleto, tama, at agad na naipapasa sa LTO ang lahat ng kinakailangang dokumento para sa pagpaparehistro ng mga bagong sasakyan.

Binigyang-diin niya na hindi dapat mapunta sa mga motorista ang epekto ng kapabayaan o hindi pagsunod ng mga dealer sa itinakdang proseso.

Ayon sa LTO, pananagutin ang mga dealership na magsusumite ng kulang o maling dokumento o magdudulot ng hindi makatwirang pagkaantala sa pagproseso ng OR, CR, at plaka.

Kabilang sa maaaring ipataw na administratibong parusa ang suspensyon o pagpapasara ng mga mapapatunayang lumalabag.

3 buwan matapos maging Ombudsman... Yaman ni Remulla, nadagdagan ng P20M

ni Jeff Tumbado @News | June 19, 2026

Photo: Boying Remulla - FB

Lumaki ng halos P20 milyon ang idineklarang yaman ni Ombudsman Jesus Crispin Remulla sa loob ng tatlong buwan matapos siyang maupo sa kanyang posisyon.

Ito ay batay sa kanyang Statement of Assets, Liabilities and Net Worth (SALN) noong Disyembre 2025.

Batay sa kopya ng SALN, tumaas ang net worth ni Remulla mula P441.737M noong Oktubre 2025 tungo sa P461.411M pagsapit ng Disyembre ng parehong taon.

Ang net worth ay kinukuwenta sa pamamagitan ng pagbawas sa kabuuang utang mula sa kabuuang halaga ng mga ari-arian.

Ayon sa kanyang SALN, si Remulla at ang kanyang asawang si Ma. Josefina ay may kabuuang ari-arian na nagkakahalaga ng P442.037 milyon noong Oktubre 10, 2025.

Kabilang dito ang P83.237M halaga ng mga real property at P358.8M na personal na ari-arian tulad ng stocks, pera sa bangko, mga alahas, kasangkapan, personal na gamit at mga sasakyan.

Nagdeklara rin sila ng P300,000 na pananagutan o liabilities na binubuo ng personal na pautang at hindi pa nababayarang subscription sa kumpanyang La Poch Villa Realty Inc.

Mayroon din silang mga shares of stock sa South Livestock, South 7 Realty at La Poch Villa Realty Inc.

Isa sa mga pangunahing dahilan ng pagtaas ng kanilang net worth ay ang pagbili ng apat na lupang sakahan sa Indang, Cavite.

Isa sa mga ito ay nabili noong 2024 sa halagang P20.032 milyon, habang ang tatlo pang lote ay nakuha noong 2025 sa halagang P1.8M, P5.224M at P8.087M.

Samantala, may ilang ari-arian na naunang idineklara ngunit hindi na lumitaw sa kanilang SALN sa pagtatapos ng 2025.

Kabilang dito ang isang bahay at lote sa Baguio City na nagkakahalaga ng P4.5M at tatlong lote sa Bacoor City na nagkakahalaga ng P1.272M, P976,248 at P1.342M.

Nananatili namang nakasaad sa kanilang SALN ang isang residential lot sa Cavite na binili noong 2022 sa halagang P3.2M.

Bumaba naman ang kanilang cash sa bangko mula P300 milyon noong Oktubre 2025 tungo sa P297.219 milyon pagsapit ng katapusan ng Disyembre ng parehong taon.

Naupo si Remulla bilang Ombudsman noong Oktubre 9, 2025 matapos ang kanyang panunungkulan bilang kalihim ng Department of Justice.

Batay naman sa 2025 Report on Salaries and Allowances ng Commission on Audit, si Remulla ang ikalawang pinakamataas ang natanggap na kabuuang sahod sa hanay ng mga miyembro ng Gabinete, na umabot sa P5.97M.

Kabilang dito ang P2.93M basic salary bilang kalihim ng Department of Justice sa unang sampung buwan ng 2025.

Bagama’t hindi siya tumanggap ng basic salary matapos maging Ombudsman noong Oktubre, nakatanggap naman siya ng P1.269M na allowances at P659,716 na bonus, insentibo at iba pang benepisyo, na may kabuuang halagang P1.929M.