Bawal ang recorder sa sinehan… P50K multa sa operator na dedma maglagay ng babala

ni Atty. Persida Rueda-Acosta - @Magtanong Kay Attorney | December 14, 2022

Dear Chief Acosta,

Ako ay nanood ng pelikula sa sinehan at napansin ko na walang anumang nakapaskil o ipinalabas na paalala kaugnay sa pagbabawal ng pagdadala ng recording device na maaaring gamitin upang i-record ang alinmang bahagi ng pelikula. Nais ko malaman kung maaari ba ito? - Alina

Dear Alina,

Ang batas na sasaklaw patungkol sa iyong katanungan ay ang Republic Act No. 10088 o mas kilala bilang “Anti-Camcording Act of 2010”. Nakasaad sa Section 7 nito na:

“Section 7. Requirement for Posting of Notices in an Exhibition Facility on the Prohibition Against the Bringing into Said Exhibition Facility of Audiovisual Recording Devices and the Like. - All exhibition facilities, cinemas or theaters shall be required to conspicuously post in at least two (2) areas in the exhibition facility including, but not limited to, the areas where tickets are sold and the entrances of the exhibition facilities, notices or signages warning against the bringing of audiovisual recording devices into the cinematographic film/audiovisual screening/exhibition area, with a reservation that the management/operator of the exhibition facility will take into preventive and temporary custody such audiovisual recording device/s until the film/movie theater patron leaves the screening/exhibition area/facility.

Failure of the management/operator of the exhibition facility to comply with the foregoing requirement will subject said management/operator liable to pay a fine of fifty thousand pesos (Php50,000).

Nothing in this Act shall prevent the management from performing such other precautionary measures so as to prevent the commission of the acts punishable herein.”

Alinsunod sa nabanggit na probisyon ng batas, ang lahat ng exhibition facilities, sinehan o teatro ay marapat na magpaskil ng babala na hindi bababa sa dalawang lugar sa nasabing pasilidad, kaugnay sa paghihigpit laban sa pagdadala ng alinmang recording device na maaaring gamitin sa hindi awtorisadong pag-record ng anumang ipinalalabas sa kanilang pasilidad. Ang alinmang exhibition facility na lalabag sa nasabing batas ay maaaring panagutin sa pamamagitan ng multa. Kaya naman, alinsunod sa batas ay maaaring mapagmulta ang may-ari o operator ng sinehan na iyong pinuntahan na hindi sumunod sa pagpaskil ng mga kaukulang babala laban sa pagdadala ng recording device sa loob ng sinehan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.